Изге Болгар җирендә «Кара пулат» операсы алдыннан Татарстан Республикасы Дәүләт Киңәшчесе Минтимер Шәймиевка «Россия рухи бердәмлеге - дөньяга юллама» фестиваленә старт бирде.
«Кадерде ватандашлар һәм кунаклар! Кадерле дуслар! Сезне Бөек Болгарның тарихи җирләрендә күрүебезгә шатбыз. Безнең Болгар меңләгән кешене үзенә тартып китерде. Иң мөһиме – халкыбызның тарихы белән кызыксынучы яшьләр күп», – диде Минтимер Шәймиев ачык һавага корылган сәхнәдән тамашачыны сәламләп.
«Былтыр гына да Болгар тарихи-археологик комплексында 800 меңнән артык кеше булды. Чагыштыру өчен 2010 елда нибары 50 мең кеше булган. 2010 елда «Яңарыш» фондын гамәлгә куеп без Борынгы Болгар һәм Зөя утрау-шәһәрчеген төзекләндерергә алындык. Халык ярдәме белән 2019 елда без бу проектны башкарып чыга алдык», - дип мәгълүмат бирде ул.
Минтимер Шәймиев Болгар тарихи-археологик комплексы ЮНЕСКО бөтендөнья мирасы объектлары исемлегенә кертелгәнлеген искәртте.
«Без хәзер тарихи ядкәрьләрне торгызып, матди булмаган мәдәни мирасны – традицияләребезне, йолаларыбызны торгызырга алындык. Хәтерләсәгез, былтыр «Эпос заманда укылышта» фестивален уздырган идек. Бу гаҗәеп тамашага әверелде һәм ул безне алга таба да бу юнәлештә эшләргә рухландырды», – диде Минтимер Шәймиев.
Дәүләт Киңәшчесе быелгы фестивальнең «Россия рухи бердәмлеге - дөньяга юллама» дип аталуы вакыт таләбе булуын ассызыклады. «Татарстанның сәясәтчеләр, икътисадчылар, эшмәкәрләр, мәдәни һәм дини эшлеклеләр өчен аралашу мәйданчагына әверелә баруын күрәбез, халыкара спорт уеннары да уза. Көзгә БРИКС илләре башлыклары саммиты узачагын да беләбез. Безнең фестиваль шушы тарихи вакыйга алдыннан уза», – диде ул.
Ул фестивальнең дөньяга юллама булуын әйтте. «Безнең фестиваль күп милләтле Россия халкының рухи бердәмлеген ачык күрсәтә. Борынгы Болгар җирләре һәм Свияжск утрау-шәһәрчеге әлеге фестивальнең мәйданчыгына әверелде», – диде ул.
«Кара пулат» операсын тамашачы көн салкынча булуына карамастан аншлаг белән карады. Опера алдыннан «Кадис Әлмәт» музыкаль төркеме чыгыш ясады.
Фестиваль тагын ике көн ярминкәләр һәм үзешчән ансамбльләр чыгышы белән дәвам итәчәк.