Чувашиядәге Татар Согыты авылының үзәк мәчете мәдрәсәсендә балалар өчен оештырылган дини белем бирү җәйге курслары тәмамланды. Бу хакта Россия мөселманнары Дини җыены Үзәкләштерелгән дини оешмасы хәбәр итә.
Дин дәресләреннән тыш, балалар өчен башка төрле мастер-класслар да оештырылган. Мәдрәсәдә яшь мөселманнар өчен күчмә дәресне авыл мәктәбенең татар теле укытучысы Гөлназ Вәлиуллова үткәргән – дәрес милли костюм, бизәкләр һәм традицияләргә багышланган.
Балалар бакчасы тәрбиячесе Гөлфрүз Салихова мәдрәсәгә йөрүче кызлар өчен прәннеккә төсле ширбәт белән милли бизәк төшерү буенча мастер-класс үткәргән. Кызлар бу шөгыльне «тәмле» дип атаган.
Шулай ук мәктәптә технология дәресе укытучысы Ләйсән Насертдинова түбәтәй һәм калфак ясау буенча мастер-класс уздырган, милли бизәкләр чигәргә өйрәткән. Авыл клубы методисты Рамилә Нәҗметдинова шәригатькә ярашлы итеп яулык бәйләү буенча мастер-класста катнашкан.
Укулар барышында волонтерлар яшь мөселманнар өчен төрле спорт ярышлары, викториналар һәм актив уеннар үткәргән.
Чувашия мөселманнары Диния нәзарәте ата-аналарга, укытучыларга, имам-хәзрәтләргә, хәйриячеләргә зур рәхмәт белдерә. Аллаһ сездән риза булсын, диелә хәбәрдә.
