Беларусь президенты Александр Лукашенко ил халкын үзенең киләчәктә дәүләт башлыгы вазифасыннан китүенә әзерләве турында белдерде. «Россия 1» телеканалында «Вести недели» программасы өчен биргән әңгәмәсендә ул шул хакта сөйләде.
«Бөтенесе болай дип саный: «Утыз ел — бик күп, акылдан язарлык. 30 ел [дәүләт башлыгы булып] эшләүче кешеләр берничә генә ул». Кешеләр шуңа күнеккән: менә ул гына һәм башка беркем түгел. Бу дөрес түгел. Мин кешеләрне шуңа (Беларусь Президенты постыннан китүгә – Т-и иск.) әзерлим, мин моның ниндидер күңел кайту яки уңышсызлык булуын теләмим», - дип аңлатты сәясәтче. Бу цитатаны ТАСС агентлыгы китерә.
Моннан тыш, Лукашенко фикеренчә, ил халкы аның Беларусьне җитәкләвенә шулкадәр күнеккән ки, хәтта Президентның, барлык кешеләр кебек үк, кайчан да булса үләчәген оныткан.
«Бу (мондый тойгы – Т-и иск.) дөрес түгел, бу дөрес түгел, чөнки ул да үләчәк. Ул кайчан да булса китәчәк, һәм башка кеше киләчәген аңларга кирәк», - дип өстәде Беларусь лидеры.
Моннан тыш, Лукашенко ассызыклаганча, Беларусь Конституциясе үзгәрешләргә җайлаштырып корылган, ә Президент үзе «революцион түгел, ә эволюцион үзгәрешләр тарафдары» булып тора. Бу турыда «Татар-информ» яза.