Татарстанлылар республиканың Яшьләр парламентына сайлауда катнаша ала. Гариза бирү кампаниясе 18 августка кадәр дәвам итә. Бу турыда «Татар-информ»да матбугат конференциясендә Татарстан Дәүләт Советы Рәисе урынбасары Юрий Камалтынов хәбәр итте.
Ул искәрткәнчә, яңа составка 100 кеше керәчәк: районнардан һәм шәһәр округларыннан 45 кеше, оешмалардан 30 кеше һәм үзен-үзе тәкъдим итүче 20 кеше. Тавыш бирү алдыннан кандидатларга берничә этап узарга туры килә, шул исәптән дебатлар һәм үзенең сайлау алды кампаниясен нигезләү.
«Яшьләр парламенты хәл итә торган бурычлар бик мөһим һәм актуаль. Алар ярдәмендә без законнарга, шул исәптән бер федераль законга, төзәтмәләр кабул иттек. Яшьләрнең бүген ни белән яшәвен аңлау бик мөһим, ә алардан башка бу хакта беркем дә сөйли алмый. Үз утырышларында алар мөһим мәсьәләләрне республика дәрәҗәсенә күтәрә, шуннан соң инде Дәүләт Советы хәл итә. Өстәвенә, бу яхшы мәктәп, анда яшьләр күрергә, анализларга һәм ишетергә, шулай ук фикерләрне идеяләргә әверелдерергә өйрәнә», - дип өстәде спикер.
Республикада Яшьләр парламентына аналоглар бөтенләй юк. Аның составына үз тирәсендәге тормышны яхшыртырга омтылучы битараф булмаган егетләр һәм кызлар керә ала, диде Камалтынов.
Матбугат конференциясе башлану белән бер үк вакытта https://molparlament-rt.ru сайтында гаризалар кабул ителә башлады. Татарстан Республикасы территориясендә теркәлгән 18 яшьтән 35 яшькә кадәрге гражданнар кандидат булырга мөмкин.
