«Казанга гашыйк бул» бәйгесендә быел дүрт номинациядә катнашырга була: «Казан турында иң яхшы видеоролик», «Туристик Казан» иң яхшы фотоэшләр», «Казан шәһәрендә туристлык турында иң яхшы мәкалә» һәм «Казан турында иң яхшы видеоролик. Команда эше». Бу хакта эшлекле дүшәмбедә туризмны үстерү комитеты директоры Дарья Санникова хәбәр итте.
Казанның күптөрлелеген һәм матурлыгын күрсәтүче урыннар, вакыйгалар, кешеләр яки шәһәр объектлары турындагы эшләрне туристлар да, 14 яшькә җиткән Казан халкы да тәкъдим итә ала.
«Минем уйлавымча, конкурста чит шәһәр кешеләре генә катнашырга тиеш түгел. Безнең төрле яшьтәге, төрле районнардагы хөрмәтле һәм кадерле кешеләребез дә катнашсыннар һәм Казанны, шул исәптән туристлыкны ничек күрүләрен күрсәтсеннәр. Без бар кеше өчен дә рәхмәт сүзләрен табачакбыз һәм һичшиксез аларның катнашуын билгеләп үтәчәкбез. Бу яхшы конкурс һәм аңа ярдәм итү мөһим», — дип белдерде мэр Илсур Метшин.
Быел конкурсның гомуми приз фонды 670 мең сум тәшкил итәчәк. Һәр номинациядә җиңүчеләр 50 меңнән 150 мең сумга кадәр грант отачак. Икенче һәм өченче урыннарны алган катнашучылар өчен дә акчалата призлар каралган.
Катнашу өчен 2025 елның 15 гыйнварына кадәр сылтама буенча онлайн-гариза бирергә кирәк. Эш шулай ук «ВКонтакте» социаль челтәрендә яки #ВлюбисьвКазань2024 хештегы булган башка платформаларда урнаштырылырга тиеш.
«Автор бердән артык эш тәкъдим итә алмый. Татарстан башкаласының тарихы, анда яшәүчеләр, сәяси контексттан тыш мөһим вакыйгалар, матур табигать күренеше, Казан һәм шәһәр халкы өчен теләкләр һәм котлаулар рөхсәт ителә», — дип ачыклык кертте Дарья Санникова.
Исегезгә төшерәбез, узган ел Россиянең 45 шәһәреннән, шул исәптән Владивосток, Симферополь, Сургут, Екатеринбургтан 255 эш җибәрелгән иде, дип хәбәр итә Казан мэриясе матбугат хезмәте.
