«Мәктәпкә әзерләнергә булыш!» республика хәйрия акциясе 2024 елда Татарстан Республикасында, шулай ук Актаныш муниципаль районында 17нче тапкыр уздырыла. Ул аз керемле, күп балалы, авыр тормыш вазгыятендә калган гаиләләрдә тәрбияләнүчеләрнең, махсус хәрби операциядә катнашучыларның балаларына яңа уку елына әзерләнүгә ярдәм итү максатыннан үткәрелә. Бу хакта «Актаныш» сайтында Ләйсән Газизова хәбәр итә.
Бу чара Гаилә елы кысаларында гаиләләрне яклау, традицион кыйммәтләрне саклау максатыннан үткәрелү белән дә үзенчәлекле.
Актаныш районында 2024-2025 нче уку елына 205 бала 1 сыйныфка укырга бара. Шулар арасында аз керемле, авыр гаиләләрдә тәрбияләнүче, махсус хәрби операциядә катнашучыларның балалары да бар.
Һәрбер бала мәктәп бусагасына беренче тапкыр аяк басканда, үзен бу дөньяда кирәкле кеше итеп хис итәргә тиеш. Аның үз-үзенә ышынычы, дөньяга карашы да шул вакытта гына дөрес формалаша. 2- 11 сыйныфларда белем һәм тәрбия алучы 2736 укучының 72се ярдәмгә мохтаҗ.
«Шуларны истә тотып, хөрмәтле райондашлар, үз мөмкинлегегездән һәм Сез җитәкчелек иткән оешмада эшләүчеләрнең мөмкинлекләреннәң чыгып, аз керемле, ярдәмгә мохтаҗ гаиләләрдә тәрбияләнүче балаларга мәктәп кирәк-яраклары белән, яки аларны алу өчен акчалата ярдәм итүегезне сорыйбыз», диелгән хәбәрдә.