Фигуралы шуу буенча Олимпия чемпионы Алинә Заһитова үзенең боз тамашасын этностильдә эшләргә ниятли. Татарстан Республикасы көненә багышланган шоу Казанда 29-31 августта узачак. Бу хакта Татарстан халыклары Ассамблеясы һәм Дуслык йорты порталы хәбәр итә.
Фигуралы шуучы сүзләренчә, шоу үткәнне, бүгенге көнне һәм киләчәкне берләштерәчәк. Тамашаның асылы аның атамасында чагылыш тапкан, ул «Вакыт сакчылары» дип атала.
«Без мөселман стилендә эшләргә тырышабыз, анда фэшн элементлары да булачак», - диде фигуралы шуучы «Алеко» Youtube-каналына биргән интервьюсында.
Алинә Заһитова шулай ук үзе һәм башка артистлар киячәк этник костюмнарның эскизларын да күрсәтте. Аның сүзләренчә, ул аларны шәхсән үзе әзерләгән. Спортчы бөтен шоу дәвамында «боздан чыкмаячагын» вәгъдә итте.
