Әлмәт башкарма комитеты җитәкчесе Айнур Исхаков кул астындагыларына гражданнарның мөрәҗәгатьләренә вакытында җавап бирмәгән һәм формаль җавап кайтарган өчен премияләрдән мәхрүм итү белән янады. ТР Әлмәт районы башлыгы Тимур Нәгуманов кушуы буенча уздырылган киңәшмә турында ул үзенең Telegram-каналында сөйләде.
Кадет паркында үлән чабуга бәйле мөрәҗәгатькә вакытында җавап булмау очрагы проблема турында фикер алышуга сәбәп булган.
«Кичә башлык Кадет паркы буенча җәза бирергә кушты. Гаеплеләрне тап һәм җәза бир, диде. Минем моңа кадәр җиткерәсем килми. Мин сезне хәзер премиядән мәхрүм итә алам», - дип белдерде башкарма комитет җитәкчесе түрәләргә мөрәҗәгать итеп.
Халык еш кына «Эшкә кабул ителде» кебек формаль һәм тулы булмаган җаваплар ала, әмма шул ук вакытта проблеманың кайчан һәм кем тарафыннан хәл ителәчәген белми, дип билгеләп үтте Исхаков, килеп туган вәзгыятьне тасвирлап.
Моңа бәйле рәвештә башкарма комитет башлыгы «тиешенчә сыйфатлы булмаган җаваплар өчен» хезмәткәрләргә «катгый шәхси җаваплылык» янаячак, дип ышандырды. Өстәвенә, кул астындагыларының гамәлләре өчен җитәкчеләргә дә җавап бирергә туры киләчәк.
