Арча районыннан Раят Насыйбуллин махсус хәрби операция зонасына беренчеләрдән булып китә һәм хәзерге вакытта граната ыргытучы булып хезмәт итә. Ире туган илне саклаганда, хатыны Гөлнур Насыйбуллина фатир сатып алган. Бу хакта «Татар-информ» хәбәрчесе Эльза Кузнецова яза.
«Арчада ипотекага фатир сатып алдык. Гадәттә, биш-алты ел чират җиткәнен көтәләр. Ә без ике ел эчендә фатирлы булдык. Документларны ирем Раят киткәнче үк җыйган идек. Ул фатирны күрмәде әле», - дип сөйләде Гөлнур Насыйбуллина.
Ул республика һәм районы хакимияте аларның гаиләсенә ярдәм күрсәтүен билгеләп үтте.
«Балаларның кәефен күтәрергә тырышалар. Күптән түгел автобуста циркка бардык, концертларга йөртәләр. Мәктәптә бушлай ашаталар. Кызым район Мәдәният йорты каршындагы хореография түгәрәгенә йөри, анда ярты бәясен генә түлибез. Хезмәт хакын кичектермиләр. Хәрби дәрәҗә никадәр югары булса, эш хакы да шулкадәр югары. Ирем башта солдат иде, хәзер – сержант, ветеран таныклыгы тапшырдылар. Медальгә тәкъдим иттеләр, анысын соңрак бирәчәкләр», - диде хәрбинең хатыны.
Бүген Насыйбуллина зур һәм иркен фатирда яши.
«Каената белән каенана – бик яхшы кешеләр. Алар белән даими элемтәдә торабыз, - ди Гөлнур. – Якыннарның ярдәме шулай ук көч бирә, түземлек өсти. Без махсус хәрби операциянең тизрәк тәмамлануын, әтиебезнең өйгә исән-сау әйләнеп кайтуын түземсезлек белән көтәбез».
