24 августта Балык Бистәсендәге Үзәк мәйданда II республика «Бистә шәле» хатын-кыз һөнәрчелеге фестивале узачак. Бу хакта Татарстан Мәдәният министрлыгы матбугат хезмәте хәбәр итә.
Фестиваль мәйданчыгына республиканың иң яхшы осталары, шулай ук әлеге халык һөнәрен яратучылар җыелачак. «Ул осталарның иҗади аралашу территориясе булып тора. Ә фестиваль кунаклары өчен бу – бөтен республика кул эшләре осталарының оригиналь эшләрен күрү өчен зур мөмкинлек. Кунаклар шәлләр һәм бәйләнгән эшләнмәләр күргәзмәсе белән таныша ала, мастер-классларда катнаша ала, осталар шәл бәйләүнең барлык серләре белән уртаклашачак. Фестиваль программасында шулай ук милли биюләр һәм халык җырлары да бар», – диелә хәбәрдә.
«Бистә шәле» фестивале программасы: 09:30-10:30 кунакларны каршы алу. Фестивальдә катнашучыларны теркәү. 11:00 фестиваль ачылышы. 11:30-14:30 Татарстан Республикасы үзешчән сәнгать артистлары чыгышы 11:30 «БалаЧак» балалар халык уен мәйданчыгы эшли башлый. 11:30 «Шәл бәйлисем килә», «Рәсемнәрдә шәл бизәге», «Бистә кабартмасы», «мамыктан бизәкләр» мастер-класслары. 11:45 «Бистә кабартмасы» милли ризыгын презентацияләү. 12:00 «Шәлдән кием Дефилесы» мода күрсәтү. 12:30 «Иң креатив шәл» конкурсы. 13:15 «Иң тиз бәйләүче» конкурсы. 13:45 «Кәтүкне тиз әйләндерү» конкурсы. 14:45 шәлнең 3D форматын тәкъдим итү. 15:00 фестивальнең ябылышы.
