Быел Татарстанда 3 мең булачак әни бердәм пособие алачак. Узган елда бу датага әлеге дәүләт ярдәме белән 3,4 мең хатын-кыз файдаланган була. Бу хакта «Татар-информ»га Татарстан Республикасы буенча Россия Социаль фондының матбугат хезмәтендә сөйләделәр.
«Бердәм пособие 2023 елның гыйнварыннан түләнә һәм 17 яше тулмаган балалары булган гаиләләргә генә түгел, ә йөклелекнең иртә срогында медицина оешмаларына учетка баскан хатын-кызларга да билгеләнә. Яшәү минимумнары арту сәбәпле, 2024 елның февраленнән бердәм пособие күләме арттырылды. Узган елда шушы чорда әлеге түләүне булачак 3,4 мең әни алган», – дип сөйләделәр матбугат хезмәтендә.
Бердәм пособие йөклелекнең беренче 12 атнасында хатын-кызлар консультациясендә учетка баскан йөкле хатын-кызларга бирелергә тиеш. Шул ук вакытта гаиләдәге җан башына уртача айлык керем Татарстанда билгеләнгән бер яшәү минимумыннан артмаска тиеш. Моннан тыш, хатын-кыз Россия гражданкасы, ә аның гаиләсе милек критерийлары буенча туры килергә тиеш.
Әлеге пособие өчен булачак әниләр йөклелекнең беренче 12 атнасында мөрәҗәгать итә ала. Ярдәм учетка баскан айдан түләнә, әмма йөклелекнең алты атнасыннан да иртәрәк түләнми.
Айлык түләү гаиләнең мохтаҗлыгына карап, республикадагы хезмәткә яраклы халыкның яшәү минимумының 50, 75 яки 1000 проценты күләмендә булырга мөмкин (50 процент — 7158,50 сум, 75 процент — 10 737,75 сум, 100 процент — 14 317 сум).
