Татарстанның энергетика компаниясе — «ТГК-16» акционерлык җәмгыяте генераль директоры Эдуард Галиев II дәрәҗә «Ватан алдындагы казанышлары өчен» ордены медале белән бүләкләнде. Указны РФ Президенты Владимир Путин имзалады, документ хокукый актларны рәсми чыгару порталында урнаштырылды.
Идарәче «ягулык-энергетика комплексын үстерүдәге казанышлары һәм күпьеллык намуслы хезмәте өчен» билгеләп үтелде, диелгән указ текстында.
Эдуард Галиев 1992 елдан бирле Татарстанның энергетика системасында эшли. 2008 елдан 2016 елга кадәр «Бердәм энергетика системасының система операторы» ачык акционерлык җәмгыятенең филиалы – Татарстан Республикасы энергетика системасының төбәк диспетчерлык идарәсе директоры була. 2016 елдан башта ачык акционерлык җәмгыяте булган, ә соңрак акционерлык җәмгыятенә әйләнгән «ТГК-16» компаниясенең генераль директоры вазифасын башкара.
«ТГК-16» компаниясе Казанның Җылылык электр станциясе-3 һәм Түбән Каманың Җылылык электр станциясенә (җитештерү-техник комплексы-1) карый. Ул 2010 елдан «ТАИФ» компанияләр төркеме составында эшли. 2021 елда килешү кысаларында компанияне «СИБУР» холдингы сатып ала, әмма 2023 елда «ТАИФ»ка кире сата.
