Татарстан башкаласында электр самокатларыннан баш тартырга җыенмыйлар. Бу хакта Казан Башкарма комитетының Транспорт комитеты рәисе Алексей Сидоров белдерде, дип хәбәр итә «РИА Новости».
«Без әлегә самокатлардан баш тартырга планлаштырмыйбыз. Бүген алар өлешчә «соңгы миля» транспорты ролен үти, ул 5 километрга кадәр йөрүне күздә тота – тукталышларга яки метро станцияләренә кадәр, паркка, яр буена яисә шәһәр үзәгендә бер истәлекле урыннан икенчесенә кадәр», — дип аңлатты түрә.
Шул ук вакытта башкарма комитет вәкиле электр самокаты йөртүчеләргә травма куркынычы булган транспорт төре белән идарә итүләрен аңлау мөһим булуына игътибар итте. Димәк, алар тизлек чикләүләрен үтәргә тиеш.
«Компанияләр безнең таләп буенча самокатларга тизлекне чикләү чарасын урнаштырды. Ул тротуарларда, җәяүлеләр өчен юл аша чыгу урыннарында, кешеләр җыела торган урыннарда автоматик режимда эшли», - дип аңлатты ул.
Транспорт комитеты рәисе ТР башкаласында юл хәрәкәте өлешендә, юл чатында, җәяүлеләр өчен юл аша чыгу урыннарында самокатта йөрүне тыйдылар, дип искәртте. Гражданнарның мөрәҗәгатьләре буенча прокат зоналары урнашу урыннары җайга салына (социаль яклау учреждениесе янында урнашкан шундый зоналарның берсе, өлкән яшьтәге кешеләрдән күп санлы шикаятьләр килү сәбәпле, юк ителде).
