Татарстанда дулкынлы атмосфера фронтын узганнан соң урнашкан салкын һәм дымлы һава торышы атна азагына кадәр сакланачак. Бу ТР Гидрометеорология үзәге хәбәр итә.
Аерым алганда, иртәгә, 23 июльдә, республика төньяк-көнчыгыш һава агымы булган циклонның тыл өлешенә эләгәчәк. Урыны белән бераз яңгыр явачак. Һава температурасы төнлә +10..+15, көндез +19..+24 градус булачак.
Чәршәмбегә каршы төндә, 24 июльдә явым-төшем көтелми, әмма көндез атмосфера фронты йогынтысы зонасында кыска вакытлы яңгыр булуы ихтимал. Тәүлекнең караңгы вакыты салкынчарак (+9..+14 градус), ә якты вакыты бераз җылырак (+20..+25 градус) була.
Пәнҗешәмбе, җомга һәм шимбә, 25, 26 һәм 27 июльдә төбәктә һава торышы сизелерлек дәрәҗәдә үзгәрмәячәк. Циклонның тыл өлешендә элеккечә вакыт-вакыт кыска вакытлы яңгыр явачак.
Төнлә термометр баганалары +9..+14 градуска кадәр төшәчәк. 25 һәм 26 июльдә көндезге сәгатьләрдә +17..+22, 27 июльдә +19..+24 градус көтелә. Шулай итеп, уртача тәүлеклек температура нормадан 3-5 градуска түбәнрәк булачак, дип фаразлана.
Элегрәк «Татар-информ» хәбәр иткәнчә, төнлә Казанның Идел буе районында айлык явым-төшем нормасының 80 проценты яуган.
