Бүген төнлә Тель-Авив шәһәре үзәгендә шартлау булган. Израиль оборонасы Армиясе матбугат хезмәте хәбәр иткәнчә, фаҗига сәбәбе билгесез һава объекты төшү аркасында килеп чыккан. Халыкка хәбәр итү системасы кушылмаган булган, дип яза ТАСС агентлыгы.
Агентлык мәгълүматлары буенча, якынча тикшерүләр күрсәткәнчә, шартлау һава объекты төшү аркасында килеп чыккан. Һава тревогасы системасы эшләмәгән. Хәзер бу хәлне җентекле тикшерү бара, фаҗига урынында Израильнең иминлек хезмәтләре эшли.
Фаҗигагә җавап итеп, илнең һава киңлеге иминлеген тәэмин итү өчен Израиль Хәрби Һава көчләре һава патрулен ныгыткан.
Җирле матбугат мәгълүматлары буенча, фаҗигадә корбаннар да булган. Газеталарның берсе бер кеше һәлак булуын яза. Икенче басма җиде кешенең җиңелчә яраланып хастаханәгә озатылуын хәбәр итә.
