Татарстанда «Татарстан – Яңа гасыр» телерадиокомпаниясе тарафыннан гамәлгә ашырыла торган «ТАТАР СҮЗЕ» V Халыкара телевизион нәфис сүз бәйгесе башланды.
Быел «ТАТАР СҮЗЕ» түбәндәге категорияләр буенча уза: 7 яшькә кадәргеләр, 8-13 яшьлекләр, 14-17 яшьлекләр, 18 яшьтән өлкәнрәкләр. Шулай ук профессионаллар һәм иҗади гаиләләр дә катнаша ала.
Чыгышлар проза, шигърият һәм «Туган тел» махсус номинациясендә бәяләнәчәк, анда чуваш, мари, мордва һәм удмурт халкы вәкилләре дә катнаша ала. Катнашучылар классиклар һәм бүгенге көн язучыларының әсәрләрен яки катнашучыларның үзе тарафыннан туган телдә язылган шигъри әсәрне сәнгатьле итеп укырга тиеш.
Оештыручылар билгеләп үткәнчә, конкурсның максаты – туган телне, әдәби мирасны пропагандалау, үстерү һәм саклау, классикларның әсәрләрен популярлаштыру, милли әдәбият һәм мәдәнияткә карата кызыксыну уяту.
Моннан тыш, чара Татарстан Республикасында, шулай ук Россия Федерациясе төбәкләрендә һәм чит илләрдә яшәүче ватандашларыбызда нәфис сүз аша туган телгә карата кызыксыну уятуда, талантлы башкаручыларга профессиональ сәхнәгә чыгарга ярдәм итеп, башкару осталыгын камилләштерү өчен шартлар тудыруда, телевизион кадрлар әзерләүдә дә зур әһәмияткә ия.
Гаризалар 2024 елның 30 ноябренә кадәр кабул ителә. Тулырак мәгълүмат: tnv.ru һәм shayantv.ru сайтларында.
