Алтынчы чакырылыш Татарстан Дәүләт Советы депутатлары үзенең эшчәнлеге белән хакимият һәм халыкның бердәмлеген күрсәтте. Бу хакта Татарстан Республикасы Рәисе Рөстәм Миңнеханов парламентның 55 утырышында белдерде.
«Алтынчы чакырылыш Дәүләт Советының эшләү чорын арттырусыз аеруча үзенчәлекле дип атарга мөмкин. Узган биш елда безнең барыбызга да мәсьәләләрне яңа шартларда хәл итәргә туры килде. Без Россия Президенты Владимир Путин һәм РФ Хөкүмәтенә бу катлаулы чорда ярдәм иткәне өчен рәхмәтле», – диде республика җитәкчесе.
Миңнеханов ассызыклаганча, сынауларга карамастан, Татарстан тотрыклы социаль-икътисади үсешен дәвам итә. Республикада импорт алмаштыру һәм илнең технологик суверенитетын тәэмин итү буенча планлы эш алып барыла, дип билгеләп үтте ул.
«Предприятиеләрнең, кече һәм урта бизнесның өзлексез эшләве, дәүләт ярдәм чаралары, илкүләм проектлар һәм республика программалары ярдәмендә узган ел йомгаклары буенча тулаем төбәк продукты 4,3 триллион сумнан артык тәшкил итте. Биш ел эчендә ул 112,3 процентка арткан. Республикада инде өченче ел рәттән рекордлы күләмдә (3 миллион квадрат метрдан артык) торак куллануга тапшырыла. Төп капиталга инвестицияләр 1,1 триллион сумнан артып китте», – диде ТР Рәисе.
Аның сүзләренчә, партнерлык финанс инструментлары кысаларында инвестицияләрне үстерү – мөһим юнәлеш. Татарстан узган елдан Россиядә махсус җайга салуны билгеләү буенча эксперимент үткәрелә торган дүрт пилот төбәкнең берсе булды.
1 июльгә булган мәгълүматлар буенча, ТР Дәүләт Советы алтынчы чакырылышта 556 закон кабул итте, дип өстәде Миңнеханов. Аның фикеренчә, ТР Конституциясенә үзгәрешләр кертү мөһим вакыйга булды.
Барлык иҗтимагый хакимият органнарын камилләштерүгә юнәлдерелгән масштаблы һәм күп көч таләп итә торган эш башкарылды. Бу үзгәрешләр республиканың милли һәм мәдәни үзенчәлекләрен чагылдырды, аның алга таба үсеш векторын билгеләде», – дип билгеләп үтте ул.
ТР Рәисе депутатлар кабул иткән башка әһәмиятле законнарны да атады. Алар шул исәптән икътисад үсеш һәм уңай инвестицион климатны тәэмин итү, салымга ташламалар бирү, халыкка адреслы ярдәм күрсәтү һәм патриотик тәрбия бирүгә кагылган.
«Республиканың күрше төбәкләр белән чикләрен билгеләү турындагы килешүләрне раслап, Дәүләт советы Татарстанның чикләре буенча кирәкле эшне тәмамлады. Бу факт безнең тарихның мөһим өлеше. Сигез килешү имзаланды», - дип хәбәр итте ул.
Махсус хәрби операциядә катнашучыларга ярдәм итүгә юнәлдерелгән закон актлары аерым урын алып тора, дип дәвам итте республика җитәкчесе.
«Бүген халык, предприятие һәм оешмалар, дәүләт һәм муниципаль хакимият органнары, шул исәптән төрле дәрәҗәдәге депутатлар батырлык һәм фидакарьлек белән хәрби бурыч үтәүче егетләребезгә ярдәм итә. Хәрбиләребезнең гаиләләре дә игътибарсыз калмый, аларга социаль түләүләр бирелә, психологик ярдәм күрсәтелә», – дип белдерде ул.
Миңнеханов сүзләренчә, депутатлар шулай ук федераль законнарны камилләштерүдә активлык күрсәткән. Мәсәлән, парламентның торак пункт территориясендә үзара салым мәсьәләләре буенча гражданнар җыеннарын үткәрү мөмкинлеге турындагы закон чыгару инициативасына федераль закон статусы бирелде.
Шул ук вакытта ТР Рәисе республиканың барлык тәкъдимнәре дә федераль закон чыгаручылар тарафыннан хупланмавын таныды.
«Бу юнәлештә даими конструктив эш таләп ителә, шул исәптән федераль дәүләт органнары вәкилләре белән хезмәттәшлек итүче һәм федераль үзәк алдында төбәк мәнфәгатьләрен яклаучы Дәүләт Думасының Татарстан депутатларының да», – дип ышана ул.
Төбәк җитәкчесе соңгы елларда Татарстанда зур масштаблы чаралар еш уздырылуын искәртте. Әйтик, быел октябрь аенда БРИКС илләре саммиты үтәчәк.
«Мондый чараларның Татарстанда үткәрелүе – безгә ышануларын раслаучы дәлил. Әлбәттә, бу хакимиятнең барлык дәрәҗәләре, шул исәптән республика парламентының эше нәтиҗәсе», – дип ассызыклады ул.
«Депутатлар, халык өчен сез иң беренче чиратта – халыктан сайланучылар. Кешеләр төрле сораулар белән мөрәҗәгать итеп, сезгә өметләнә. Беләм, сез халык белән даими элемтәдә торасыз, конкрет тормыш хәлләрендә ярдәм күрсәтәсез, хәрбиләрнең гаиләләре белән очрашасыз, төрле өлкәләрдә волонтерлык эшчәнлеге алып барасыз», – дип мөрәҗәгать итте Рөстәм Миңнеханов парламентарийларга.
Аның фикеренчә, болар барысы да республика җитәкчелегенә хәл итәргә кирәк булган беренчел бурычларны (шул исәптән илкүләм проектлар һәм республика программалары кысаларындагы бурычларны) тагын да яхшырак аңларга мөмкинлек бирә.
«Сентябрьдә җиденче чакырылыш ТР Дәүләт Советы депутатларын сайлау узачак. Яңа вәкилләр киләчәк. Кайсыларыгыздыр парламентта үз эшен дәвам итәчәк. Яңа чакырылыш парламент депутатларының эше дә шундый ук эффектив һәм гомуми нәтиҗәгә юнәлдерелгән булыр, дип өметләнәм», – дип нәтиҗә ясады ТР Рәисе.
Бу сүзләрдән соң ул дәүләт бүләкләрен тапшырды.
