Түбән Каманың 60 еллыгын бәйрәм итәргә җыеналар. Шәһәр башлыгы Рамил Муллин Телеграм-каналында бәйрәмгә кагылышлы планнары белән уртаклашты. Бу хакта http://nkamsk-rt.ru/ сайтында Фәридә Зарипова яза.
«Безнең хыялыбыз һәм максатыбыз — Түбән Каманы, аның 60 еллык юбилеена, неоиндустриаль, заманча, кызыклы, уңайлы мохиткә әверелдерү. Республика, район сәнәгать предприятиеләре ярдәме бар, команданың бердәмлеге бар — кадерле түбәнкамалылар, сезнең белән барысы да килеп чыгачак дип ышанам!» — дип язган Рамил Муллин.
Хәзер Түбән Камада балалар поликлиникасы төзелә, химия-технология кластерын булдыру дәвам итә, аңа 35нче лицей, 7нче мәктәп һәм балалар экология-биология үзәге керәчәк. Моннан тыш, Түбән Кама химия-технология корпусын реконструкцияләү ахырына якынлаша, җылылык челтәрләрен «Татэнерго» җәмгыятенә тапшыру башлана.
