Галимҗан Ибраһимов исемендәге Тел, әдәбият һәм сәнгать институтына яңа җитәкче билгеләнде. ТР Фәннәр академиясе президенты Рифкать Миңнеханов коллективка яңа директорны – Халиков Илгиз Илдар улын тәкъдим итте. Бу хакта «Миллиард.Татар» сайты телеграм-каналында хәбәр ителә.
2006 елдан бирле институт директоры булган Ким Миңнуллин быел 28 июньдә вазифасыннан китте. Ул институттан китәргә җыенмыйм, биредә фәнни хезмәткәр сыйфатында эшләп калачакмын һәм үземне фәнгә багышлаячакмын дип белдергән иде.
Илгиз Халиков 1983 елның 27 августында Башкортстанның Стәрлебаш авылында туган. «Татар һәм рус теле укытучысы» белгечлеге буенча Стәрлетамак дәүләт педагогика академиясен тәмамлаган. 2008 елда диссертация яклаган.
2016 елда «Белем бирүдә менеджмент» белгечлеге буенча Татар институты дипломын алган. Төрле вазифаларда эшләгән, аерым алганда, мәктәп директоры урынбасары һәм ТР милли мәгариф бүлеге башлыгы булган.
2019 елдан Бөтендөнья татар конгрессы Башкарма комитеты җитәкчесе урынбасары вазифасын биләгән, ә соңрак милли мәгариф идарәсен җитәкләгән.
