29 июньдә Әлмәттә йөзләгән актив һәм талантлы шәһәр халкын берләштергән яшьләр көне узды. Бәйрәм берьюлы ике мәйданчыкта – «Мирас» спорт комплексы каршында һәм «Нефтче» хоккейны үстерү үзәге янында башланды. Бу хакта «Әлмәт таңнары» газетасы яза.
Кунаклар автомобильләр күргәзмәсе белән танышты, һөнәрчеләр һәм эшмәкәрләр эшләре белән яшьләр маркеты булды. Музыка сөючеләр өчен караоке-лофт эшләде, ә актив ял сөючеләр лазертаг буенча турнирда катнашты. Шулай ук барлык теләүчеләр өчен мастер-класслар, бию баттлы һәм концерт программасы оештырылды.
Гаилә елы кысаларында яшь парлар конкурсы узды, анда тугыз пар катнашты. Яшь пар бәйрәм сәхнәсенә туй киемнәрендә яңадан антлар алмашу һәм үз мәхәббәт тарихларын сөйләү өчен чыкты. Конкурс нәтиҗәләре буенча барлык катнашучылар төрле номинацияләрдә бүләкләнделәр.
Моннан тыш, яшьләр көне кысаларында Әлмәттә Россиядә социаль активлыкны үстерү өчен беренче социаль франшиза ачылды. Бу проект һәр кешенең үзара ярдәм итүенә һәм хәйриягә җәлеп ителүенә шартлар тудырырга тиеш. Татарстан республикасы яшьләр эшләре буенча министр урынбасары Айгөл Сабирова, район башкарма комитеты җитәкчесе Айдар Каюмов һәм Әлмәт балалар һәм яшьләр эшләре идарәсе башлыгы Илнур Фәсхетдинов яшьләрне котларга һәм бүләкләргә килде. Алар яшьләр инициативасының һәм шәһәр, республика хакимиятләре тарафыннан күрсәтелә торган ярдәмнең мөһимлеген билгеләп үтте.
«Әлмәт – яшь, динамик үсештә булган, яшьләре күп булган шәһәр. Рәсми рәвештә саналган 50 меңнән артык кеше яшьләр статусына ия. Яшьләр – ул, беренче чиратта, җан халәте. Шуңа күрә мин сезне нәкъ менә шуның белән котлыйм, сезнең күңелегездә һәрвакыт яшьләр халәте булсын, һәрвакыт иҗади, төрле яңалыклар, технологияләр кулланылсын, уйлап чыгарылсын һәм һәрвакыт барлык техник эшләнмәләрнең алдынгылары булсын», – дип билгеләп үтте Айдар Каюмов.
Чара Татарстан Республикасы артистлары һәм музыкаль төркемнәр катнашында концерт программасы белән тәмамланды, диелә хәбәрдә.
