Бүген төнлә Казанның Идел буе районындагы Кукушкино торак массивы янында, Идел буенда шәхси әйберләр табылган. Урынга килгән водолазлар ун метр тирәнлектән 43 яшьлек ир-атның мәетен өскә чыгарган. Бу хакта Россия Гадәттән тыш хәлләр министрлыгының ТР буенча Баш идарәсе хәбәр итә.
Билгеләп үтелгәнчә, әлеге урын коену өчен җиһазландырылмаган. Су һәм һава температурасындагы үзгәрешләр нәтиҗәсендә ир-атны көзән җыергандыр яки үпкәсе кысылгандыр, мөгаен.
Моннан тыш, бу урында елга төбендә чит әйберләр дә булырга, алар суга чумган ир-атны җәрәхәтләргә мөмкин. Үлем сәбәбен белгечләр ачыклаячак.
