Бүген Казанның Тынычлык бистәсендәге Каенлыкта татарларның милли бәйрәме Сабан туе уза. Татарстан Республикасы Рәисе Рөстәм Миңнеханов бәйрәмнең тантаналы ачылышында кунакларны сәламләде.
«Чын күңелдән барыгызны да матур бәйрәмебез - Сабан туе белән котлыйм. Безнең иң яраткан бәйрәмебез БРИКС илләре уеннары белән бер вакытка туры килде. БРИКС илләре уеннарын уздыру - ул хөкүмәтнең, Россия Федерациясе Президентының безгә булган ышанычы. Мөмкинлектән кулланып, әлеге ярышларга килгән кунакларга, казанлыларга, башка регионнардан килүчеләргә бердәм булып, дуслыкта һәм татулыкта әлеге бәйрәмне уздырганыбыз өчен рәхмәтемне җиткерәсем килә», - диде Рөстәм Миңнеханов.
Соңыннан Татарстан Рәисе тантаналы рәвештә БРИКС уеннарының тәмамлануын игълан итте. «БРИКС уеннары тәмамланды. Әлеге ярышларда катнашучы барлык спортчыларга да зур рәхмәт», - диде ул.