Татарстан Республикасы «Беренчеләр хәрәкәте»нең «Әһәмиятле беренче» («Значимый первый») проекты эшли башлаячак пилот төбәкләрнең берсе булачак. Бу хакта оешманың матбугат хезмәте хәбәр итә.
Хәрәкәт һәм Волонтерлык үзәкләре ассоциациясенең уртак инициативасы халык хуҗалыгы казанышлары күргәзмәсендә (ВДНХ) узучы «Россия» күргәзмә-форумында тәкъдим ителде. Аның максаты – авыр тормыш хәлендә булган балалар белән эшләү буенча остазлар җәмгыятен формалаштыру.
«Бүген Россиядә 800 меңнән артык бала һәм яшүсмер авыр тормыш хәлендә. <...> Остазларны сайлап алу һәм укыту 11 пилот төбәктә быел август аенда старт ала, ә инде октябрьдә яшүсмерләр белән беренче практик эш башланачак», — дип сөйләде «Беренчеләр хәрәкәте» идарәсе рәисе Григорий Гуров.
Татарстаннан тыш, пилот төбәкләр арасында Карачай-Черкесия Республикасы, Пермь һәм Хабаровск крайлары, Вологда, Калининград, Кемерово, Омск, Ростов, Тверь һәм Тула өлкәләре бар.
Проект кысаларында авыр тормыш хәлендә булган балаларга профилактика үткәрү буенча остаз эшенең моделен булдыру күздә тотыла. Ул һәр яшүсмер белән индивидуаль эшләү һәм аны «Беренчеләр хәрәкәте»нең коллектив эшчәнлегенә җәлеп итүне үз эченә алачак.
Остазлыкка кандидатларның компетенцияләре һәм осталыкларын үстерүгә юнәлдерелгән чараларны оештыруга аерым игътибар биреләчәк. Алар өчен махсус белем бирү программасы әзерләнгән.
Остазлар эшен Россия Эчке эшләр министрлыгы, шулай ук балигъ булмаганнар белән системалы рәвештә эшләүче һәм остазлык программаларын гамәлгә ашыручы коммерцияле булмаган оешмалар белән үзара хезмәттәшлектә РФ Мәгариф министрлыгы, Яшьләр эшләре буенча федераль агентлык (Росмолодежь), РФ Мәгариф һәм фән министрлыгы ярдәме белән оештыру планлаштырыла.
