Түбән Каманың Каенлы авылында күренекле дин белгече, халык табибы, язучы һәм мәгърифәтче Таҗетдин Ялчыгол истәлегенә мемориаль такта кую тантанасы булды. Бу хакта https://nkamsk-rt.ru/ сайтында Фәрит Имамов яза.
Әлбәттә, һәрбер зур эштә башлап йөрүче кирәк. Түбән Кама шәһәрендә җаваплы урыннарда эшләп, хәзерге вакытта туган авылы Каенлыда гомер итүче Рафаил Хәбибуллинның мәшһүр авылдашы Т. Ялчыголга мемориаль такта ачу нияте инде күптән бар иде. Һәм менә ул, теләктәш кешеләр ярдәме белән, үзенең ниятен тормышка ашырды.
Таҗетдин Ялчыголның нәсел җебен дәвам итүчеләрнең берсе Дамир Ахуновка һәм әлеге күркәм чараны оештыручы Рафаил Хәбибуллинга мемориаль тактаны ачу хокукы бирелде. Мәдәният йорты диварына беркетелгән истәлек тактасыннан ак япманы алу бу көннең иң тантаналы мизгеле булгандыр, мөгаен.
Мәгърифәтченең нәсел җебен дәвам итүчеләр әле тагын булган икән — алар мемориаль такта янына җидәү чыгып басты. Үзләренең уй-фикерләре белән уртаклаштылар, шушындый чараны оештыручыларга рәхмәтләрен җиткерделәр.
