2024 ел ахырына барлык федераль ярдәм чаралары автомат рәвештә - «документлар һәм белешмәләр җыймыйча» күрсәтеләчәк. Бу хакта Россия Премьер-министры вазифасын башкаручы Михаил Мишустин Дәүләт Думасында аның Хөкүмәт рәисе вазифасына кандидатурасын карауда әйтте. ТАСС шул хакта яза.
Ул искәрткәнчә, ана капиталы бала туу факты буенча, документлар җыюдан һәм ата-аналарның шәхси катнашуыннан башка бирелә - бу социаль казначылык механизмын кертү ярдәмендә мөмкин булды, ул дәүләт ярдәмен автомат рәвештә күрсәтүне яки аны бер гариза нигезендә алу мөмкинлеге бирә.
«Бу форматка 40ка якын федераль чара күчерелде. Ел ахырына кадәр аны калганнарга карата да кулланабыз. Киләсе елдан төбәк ташламаларын алуны гадиләштерүгә игътибар бирәбез», - дип сөйләде Михаил Мишустин.
Элегрәк хәбәр ителгәнчә, Премьер вазифасын башкаручы РФ Хөкүмәтенең 6 елга өстенлекле эшләрен әйтте. Бүген Дәүләт Думасында чыгыш алдыннан Михаил Мишустин РФ Президенты Владимир Путин белән очрашты.
