Новости за 15.10.2024

Питрәч районы башкарма комитеты җитәкчесе итеп Илназ Дәүләтханов билгеләнде. Депутатлар аны район Советының 47нче утырышында ачык тавыш бирү юлы белән сайлады. Чарада Татарстанда Кеше хокуклары буенча вәкаләтле вәкил Сәрия Сабурская һәм район башлыгы Рәис Сөләйманов катнашты, дип яза «Татар-информ».

Пенза өлкәсе татар милли-мәдәни автономиясе офисында «Рухи-әхлакый культураны һәм яшьләргә гражданлык-патриотик тәрбия бирүне формалаштыруда социаль институтларның роле: хәзерге дөньяның яңа чынбарлыгында» темасына багышланган түгәрәк өстәл булды. Бу хакта «ВКонтакте» социаль челтәрендә автономиянең сәхифәсендә хәбәр ителә.

Әлмәт театры 80 еллык юбилее уңаеннан булачак тантанага әзерләнә. Театр директоры Фәридә Исмәгыйлева һәм артистлар әлеге чарага әзерлекнең ничек баруын һәм тамашачыны ниләр көтәчәге турында сөйләде.

Россия парламентарийлары җәмгыять өчен бернинди файда китерми торган квадроберлар субкультурасын контрольдә тотачак закон проекты эшли. Бу хакта Думаның Мәдәният комитеты рәисе беренче урынбасары, Россиянең атказанган артисты Денис Майданов хәбәр итте.

Россиядә иминият пенсияләре 1 гыйнвардан 7,3 процентка артачак. Индексация эшләүчеләргә дә, шулай ук эшләмәүчеләргә дә кагыла. Бу хакта Дәүләт Думасы депутаты Светлана Бессараб «Лента.ру»да әңгәмә вакытында сөйләгән.

Нурлат районыннан Лисичанск һәм Рубежное шәһәрләренә 19 тонна гуманитар ярдәм китерделәр. Татарстан шефлыгындагы шәһәрләргә 150дән артык шифер, 15 кубометр агач материалы, 17 рулон фольгаизол һәм 126 төргәк җылыткыч тапшырылды.

Россия Хөкүмәте ил гражданнары өчен кулланучылар тарафыннан үзләренә кредит бирүне тыю мөмкинлеген раслады. Норма киләсе елның 1 мартыннан үз көченә керә. Бу карар турында Министрлар Кабинеты матбугат хезмәте хәбәр итә.

Дөньяның югары уку йортларының глобаль рейтинглары БРИКС илләренең үзенчәлегенә дә, аларның үсеш максатларына да туры килми. Шуңа күрә халыкара берләшмә әгъзалары вәкилләре тарафыннан БРИКС университетлары рейтингын булдыру идеясе хупланды. Бу хакта RAEX рейтинг агентлыгы генераль директоры Дмитрий Гришанков ТАССка биргән интервьюсында хәбәр итте.

30 октябрьгә кадәр Татарстанда төп операцион үзәк эшләячәк. Аның эше Казанда БРИКС саммитын әзерләү һәм уздыру белән бәйле. Бу хакта Татарстан Премьер-министры Алексей Песошин имзалаган карарда белдерелә.

Куйбышев тимер юлының Бөгелмә станциясендә локомотив һәм мазут төягән өч вагон-цистерна рельстан чыккан. Зыян күрүчеләр юк. Бу хакта Идел буе транспорт прокуратурасы хәбәр итә.

1 октябрьгә Татарстанның дәүләт бурычы күләме 123,5 млрд сумнан артык тәшкил иткән. Бу узган ай башына караганда 79,5 млн сумга кимрәк. Республика Финанс министрлыгында шул хакта хәбәр иттеләр.

Түбән Кама балалар хастаханәсенең элеккеге баш табибы, Татарстанның атказанган табибы Рамил Хәмидуллин вафат. Бу хакта Түбән Кама шәһәре сәламәтлек саклау идарәсендә хәбәр иттеләр.

Агымдагы елның 3-7 ноябрендә Татарстан башкаласында Спортның су төрләре сараенда ТР Рәисе Кубогына суга сикерү буенча халыкара ярышлар узачак. Бу хакта вакыйганы оештыручылар хәбәр итә.

Татарстан Дәүләт Советында Россия Дәүләт Думасына квадроцикллар, скутер, питбайк һәм башка индивидуаль мобильлек чараларын сатып алуда һәм эксплуатацияләүдә закон чикләүләрен эшләү өчен материаллар җыялар. Бу хакта «Татар-информ»га республика парламенты депутаты Марат Бариев белдерде.

7 октябрь көнне Г.Тукай исемендәге татар дәүләт филармониясе сәхнәсендә «Китап» радиосы тарафыннан уздырылган «Карачтау авылы көйләре» – Татар җырын башкаручылар арасында Таһир Якупов исемендәге II республика фестиваль-бәйгесенең гала-концерты узды. «Китап» радиосының тапшырулар мөхәррире Гөлинә Шәйхи бәйге турындагы уй-фикерләре белән уртаклашты.

Казанда барлык кунакханәләр дә БРИКС саммиты көннәрендә чит ил делегацияләрен һәм кунакларын кабул итәргә әзер. Бу хакта «Татар-информ»га Казан һәм Татарстан Республикасы кунакханәләре Ассоциациясе башкарма директоры Александра Юшутина сөйләде.

Әстерхан өлкәсе «Дуслык» татар мәдәнияте оешмасы рәисе Әнвәр Алмаев татар теле укытучыларын һәр ел саен Укытучылар көне һәм Яңа ел белән котлап төрле чаралар уздыра. Быел да ул мул табынлы бәйрәм оештырган. Әстерхан өлкәсендә татар милли мәдәниятен, телен һәм татар халкының тарихын саклап калу эшен актив алып бараган 17 укытучы кунакка килгән. Бу хакта Бөтендөнья татар конгрессы матбугат хезмәте хәбәр итә.

Татарстан башкаласында 19-25 октябрьдә автомобиль хуҗалары, шулай ук каршеринг сервисларыннан файдаланучылар БРИКС саммиты уздырыла торган урыннар янындагы урамнарда муниципаль парковкалардан файдалана алмаячак. Бу вакытта урыннарда чараны оештыручыларның аккредитацияләнгән транспорты тукталачак. Бу хакта аппарат киңәшмәсендә шәһәр Башкарма комитеты җитәкчесе урынбасары Илдар Шакиров хәбәр итте.

Бүген, 15 октябрьдә, Татарстанда антициклон тәэсирендә урнашкан салкын, кояшлы һәм коры һава торышы саклана. Бу хакта ТР Гидрометеорология үзәге хәбәр итә.

Бүген Актаныш районы гражданлык хәле актларын теркәү бүлегендә елның илленче никахы - Данияр Шәймурзин белән Лиана Галимованың гаиләләрен рәсмиләштерү тантанасы узды. Кияве белән кызының туена махсус хәрби операциядә катнашучы Илнар Галимов та кайткан иде. Яшьләрне котларга Актаныш районы башлыгы Ленар Зарипов та килде. Бу хакта «Актаныш» сайтында Ләйсән Газизова яза.

Мамадыш районы башлыгы Вадим Никитин волонтерлар белән тау чаңгысы комплексы территориясендә агачлар утыртуда катнашты. «Урман утырту көне» акциясе кысаларында 250дән артык өрәңге һәм миләш үсентесе утыртылды. Бу хакта «Нократ» сайтында хәбәр ителә.

Әлмәттә яшәүче Расих һәм Рәзинә Гатауллиннар зөбәрҗәт туйларын билгеләп үтте. Алар 55 ел тату яшиләр. Бу үзенчәлекле көнне, 55 ел элек кебек үк, бәхетле пар якыннарыннан һәм дусларыннан чын күңелдән котлаулар кабул итте. Бу хакта «Әлмәт таңнары» хәбәр итә.

Бөтен Россия буенча 2021 елдан октябрьнең өченче якшәмбесендә Әтиләр көне билгеләп үтелә. Быел бәйрәм 20 октябрьгә туры килә. Бу көнгә Түбән Кама районы әтиләре ассоциациясе «Түбән Камада әтиләр атнасы» дип аталган гаилә экскурсияләре программасы эшләде, анда әтиләр һәм балалар бергә вакыт үткәрә алачак. Бу хакта http://nkamsk-rt.ru сайтында Фәридә Зарипова яза.

Аксубайда җәмәгать киңлегендә (Мазилин һәм Дуслык урамнары арасында) Агач утырту көне узды. Шимбә иртәсендә бер мәйданчыкта Алмаз Мингулов җитәкчелегендәге район Советы, Башкарма комитеты хезмәткәрләре, Аксубай урманчылыгы һәм урман хуҗалыгы хезмәткәрләре, Аксубайның 3нче мәктәбе коллективы җыелды. Бирегә Татарстан Дәүләт Советы депутаты Камил Гыйльманов та килде. Бу хакта «Авыл таңнары» хәбәр итә.