Новости за 31.07.2024

Владимир шәһәрендә татар халкының борынгы, күркәм халык бәйрәме – Сабан туе оештырылды, дип хәбәр итә «Татарстанның мәдәни ресурс үзәге» матбугат хезмәте.

Татарстан Рәисе Рөстәм Миңнеханов Симферополь Җәмигъ мәчетендә булды. Бу – Кырым һәм Көнчыгыш Европадагы төп һәм иң зур мәчет. Кырым һәм Севастополь мөселманнары Диния нәзарәте рәисе, мөфти Эмирали Аблаев ТР Рәисенә мәчет буйлап экскурсия үткәрде. Бу хакта «Татар-информ» агентлыгына ТР Рәисенең матбугат хезмәте җитәкчесе Лилия Галимова хәбәр итте.

Татарстанның Лаеш районы Столбище авылында ике ир-ат яшен сугу нәтиҗәсендә төрле җәрәхәтләр алган. Республика клиник хастаханәсендә «Татар-информ» агентлыгына бу мәгълүматны расладылар.

Татарстан башкаласында 30 ел бергә гаилә корып яшәүчеләрне бүләкләячәкләр. Тантаналы чара 2 августта Казан Кремлендә узачак. Гаиләләрне хөрмәтләү тантанасы 16.00 сәгатьтә Туп ишегалды музее территориясендә башлана, дип хәбәр итә Казан мэриясе матбугат хезмәте.

Түбән Новгород өлкәсенең Автозавод районы Үзәк мәдәният һәм ял паркында Сабантуй бәйрәменә багышланган чара узды. Анда 10 меңнән артык кеше катнашты. Чараны быел үзенең 20 еллык юбилеен билгеләп үткән Түбән Новгород өлкәсе татарлары төбәк милли-мәдәни автономиясе оештырды. Бу хакта Бөтендөнья татар конгрессының матбугат хезмәте хәбәр итә.

Махсус салым режимы гамәлдә булган биш елда Татарстанда 342,3 меңнән артык кеше үзмәшгуль сыйфатында теркәлгән. Бу вакыт эчендә үзмәшгульләр 83 миллион чек формалаштырган һәм республика казнасына 6,8 миллиард сум салым түләгән, дип хәбәр итә ТР Икътисад министрлыгы.

Ислам каршылык хәрәкәте (ХАМАС) сәяси бүлеге башлыгы, Палестина автономиясенең премьер-министры Исмәгыйль Хания һәлак булуы сәбәпле, Россия Федерациясе мөселманнары диния идарәсе рәисе, мөфти шәех Равил Гайнетдин кайгы уртаклашты. Бу хакта Россия Федерациясе мөселманнары Диния нәзарәте матбугат хезмәте хәбәр итә.

Казан метросында ТР Дәүләт Советы депутатларын сайлаулар турында искәрткән плакатлар күренә башлады. Бу хакта «Татар-информ» агентлыгы журналисты хәбәр итте.

Татарстанда РФ Саклану министрлыгы белән контракт төзегән гражданнар 1 миллион 705 мең сумга кадәр акча алачак. Түләүнең күләме арту РФ Президентының 1 августтан һәм ел ахырына кадәр махсус операция зонасында хезмәт итү өчен контракт төзегән хәрбиләргә 400 мең сум күләмендә федераль түләүләр турындагы яңа указы белән бәйле.

Россия Президенты Владимир Путин махсус операция зонасында хезмәт итү өчен Саклану министрлыгы белән контракт төзегән хәрбиләргә 1 августтан 31 декабрьгә кадәр 400 мең сум күләмендә бер тапкыр акча түләү турындагы указны имзалады. Бу хакта РИА Новости агентлыгы хәбәр итә.

Татарстан Рәисе Рөстәм Миңнеханов Кырым башлыгы Сергей Аксенов белән очрашты.

Татарстан Премьер-министры урынбасары Фәнил Әһлиуллин, мәктәпләрнең яңа уку елына әзерлеген бәяләү өчен, Лисичанск һәм җирле белем бирү учреждениеләре җитәкчелеге белән очрашу оештырды. Укучылар һәм мөгаллимнәр ияләнгән уку процессына әйләнеп кайта алсын өчен, ул белем йортларын әзерләүнең мөһимлеген искәртте.

Май аенда Татарстан Журналистлар берлегенең ХXI съезды булып узды. Биредә рәис сайланды. Казан федераль университетының филология һәм мәдәниятара багланышлар институты студенты Ихтыяр Кыямов берлеккә керергә теләвен әйтә.

Россия Президенты карары буенча, Россиядә стратегик булмаган атом-төш көчләре өйрәнүләренең өченче этабы башланды. Бу хакта Россиянең Саклану министрлыгы хәбәр итә.

Дәүләт Думасы депутатлары Россия һәм чит ил гражданнары өчен телефон номерлары санын чикли торган закон проектын ахыргы укылышта кабул итте. Бу хакта РИА Новости яза.

Татарстан Фәннәр академиясенең Археология институты галимнәре Саратов өлкәсендә казу эшләре вакытында Алтын Урда чорына караган объектлар тапкан. Табылдыклар турында институтның телеграм-каналында сөйләделәр.

Тәүлегенә алты сәгатьтән кимрәк йоклаучы кешеләрдә иртә үлем куркынычы 30 процентка күбрәк. Бу хакта Россия Сәламәтлек саклау министрлыгы башлыгы Михаил Мурашкога сылтама белән ТАСС хәбәр итә.

Татарстанда халык сәнгать һөнәрләре һәм кәсепләре осталарының бердәм базасын булдыру кагыйдәләре расланачак. Эш әлеге юнәлешне саклау, торгызу һәм үстерү өчен алып барыла. Бу хакта ТР Мәдәният министрлыгы боерыгы проектыннан аңлашыла. Документ коррупциягә каршы экспертиза уза.

Россиядә эш бирүчеләр, мәгариф учреждениеләре һәм мәшгульлек үзәкләренең үзара хезмәттәшлеге өчен кадрлар үзәкләре барлыкка киләчәк. Бу хакта РИА Новости РФ Премьер-министры Михаил Мишустинга сылтама белән хәбәр итә.

Бүген Татарстанда алмашынучан болытлы һава көтелә. Яңгыр явачак, кайбер районнарда яшен, боз явачак. Бу хакта ТР Гидрометеоүзәгенең матбугат хезмәте хәбәр итә.

Алабугада XVII Бөтенроссия Спас ярминкәсе 3, 4, 5 августта узачак. Бу хакта «Алабуга нуры» сайтында хәбәр ителә.

Питрәч районы Чыты мәдәният йорты директоры Миннур Шәмсетдинов үз проектын гамәлгә ашыра башлады. Ул балаларны шәхси музеендагы хәрби экспонатлар белән таныштыру өчен ГАЗ-69 машинасында авылларга чыгачак. Киләчәктә Питрәчне генә түгел, күрше районнарны дә колачларга ниятли. Бу хакта «Алга» сайтында Люция Сираҗиева яза.

Яңа Чишмә районында иң яхшы комбайнчыларга һәм машина йөртүчеләргә атна саен акчалата премияләр һәм кызыл әләмнәр тапшырыла. Бу атна башында районның авыл хуҗалыгы идарәсе урып-җыюда комбайнчылар һәм машина йөртүчеләр арасындагы ярышның беренче атнасына йомгак ясады. Бу хакта «Яңа Чишмә хәбәрләре» сайтында Азат Мусин яза.

Түбән Каманың берничә парк һәм скверын ремонт көтә, эшләрне августта башкару планлаштырыла. Түбән Кама районы Башкарма комитеты дәүләт сатып алулары порталында тиешле тендерны бастырды. Бу хакта https://nkamsk-rt.ru/ сайтында Фәридә Зарипова яза.

Менделеескидан Яна Шалаумова «Спас гүзәле-2024» бәйгесендә катнаша. Конкурс Алабугада XVII Бөтенроссия Спас ярминкәсе кысаларында уза. Бу хакта «Менделеевск яңалыклары» хәбәр итә.