Новости за 25.07.2024

Татарстан Республикасы Премьер-министры урынбасары, Бөтендөнья татар конгрессы Милли шурасы рәисе Васил Шәйхразыев эш сәфәре белән Омск өлкәсендә. Биредә ул Омск өлкәсе Усть-Ишем районының су басудан зыян күргән Эбәркүл, Олы Бүрән (Тюрметяки), Әшеван авылларында булды. Бу хакта Бөтендөнья татар конгрессы матбугат хезмәте хәбәр итә.

Татарстан Республикасында XIX гасыр һәм XX гасырның беренче яртысында Казан Идел буе территориясендә яшәгән халыкларның традицион киемнәрен яңадан торгызу буенча тарихи-этнографик проектны гамәлгә ашыруны дәвам итәләр. Бу хакта Татарстан Мәдәният министрлыгы хәбәр итә.

15 июльдән Татарстанның биш районында яңа форматтагы лагерьлар эшли башлады.

Иртәгә, 26 июльдә, Казанда ВИЧ-инфекциягә бушлай һәм аноним экспресс-тест үткәреләчәк. Табиблар Горький исемендәге паркта, «Хезмәт резервлары» стадионы каршында дежур торачак. Бу хакта Казан мэриясе порталы хәбәр итә.

Татарстанда ясалма интеллект тиешсез урыннарда тәмәке тартучыларга тавыш көчәйткечләр аша кисәтү ясый башлады. Бу хакта үзенең Telegram-каналында ТР цифрлар министрлыгы башлыгы Айрат Хәйруллин сөйләде.

Татарстан Сәламәтлек саклау министрлыгы 2024 елда республикада яшәүче 1,2 миллион кешегә диспансеризация үткәрергә планлаштыра. Бу хакта Татарстан Республикасы сәламәтлек саклау министры Марсель Миңнуллин «Татар-информ»да узган Татарстанда «Сәламәтлек саклау» илкүләм проектын гамәлгә ашыруга багышланган матбугат очрашуында хәбәр итте.

Киләсе елда Казанда Россия һәм Кытай галимнәре дала Евразиясе тарихын өйрәнү темасына багышланган тикшеренүләренең нәтиҗәләре белән уртаклашачак. Бу хакта «Татар-информ»да узган матбугат очрашуында ТР Фәннәр академиясенең Альберт Халиков исемендәге Археология институты директоры Айрат Ситдыйков хәбәр итте, дип яза «Татар-информ» хәбәрчесе Арсений Кәримов.

Россиянең берничә зур шәһәрендә, шул исәптән Воронеж, Калининград, Пенза һәм Казанда хәвефле тенденция күзәтелә: социаль челтәрләрдә яшүсмерләрне эзәрлекләүгә юнәлдерелгән каналлар барлыкка килә. Бу хакта үзенең Telegram-каналында Куркынычсыз интернет лигасы директоры Екатерина Мизулина сөйләде.

Татарстанда Казан предприятиеләренең берсендә эшче һәлак булу факты буенча җинаять тикшерүе башланды. Фаҗига 2024 елның 20 июлендә була. Металл эшкәртү станогыннан чыгып очкан заготовкадан завод эшчесе җәрәхәтләнә. Медицина ярдәме күрсәтелүгә карамастан, ул хастаханәдә вафат була.

Россиядә киләсе Яңа ел бәйрәмнәре - 11, ә май бәйрәмнәре 8 көн дәвам итәчәк. Бу хакта РФ Хезмәт министрлыгы матбугат хезмәтенә сылтама белән «РИА Новости» хәбәр итә.

Россия һәм Сириянең Президентлары Владимир Путин белән Башар Асад кичә кич Мәскәү Кремлендә сөйләшүләр уздырды. Бу хакта Россия лидерының матбугат хезмәте хәбәр итә.

Әлмәт башкарма комитеты җитәкчесе Айнур Исхаков кул астындагыларына гражданнарның мөрәҗәгатьләренә вакытында җавап бирмәгән һәм формаль җавап кайтарган өчен премияләрдән мәхрүм итү белән янады. ТР Әлмәт районы башлыгы Тимур Нәгуманов кушуы буенча уздырылган киңәшмә турында ул үзенең Telegram-каналында сөйләде.

Президент Владимир Путин тикшерү органнары хезмәткәрләре һәм ветераннарын һөнәри бәйрәмнәре белән котлады һәм аларга ныклыклары, принципиальлекләре, нәтиҗәле намуслы хезмәтләре, үз вазифаларына тугрылыклары һәм иң яхшы традицияләргә тиңләшергә омтылулары өчен рәхмәт белдерде.

«Яңа кешеләр»дән Дәүләт Думасы депутаты Анна Скрозникова Мәгариф министрлыгына өлкән сыйныфларда укучы кыз балалар өчен физкультура дәресләренә үз-үзеңне яклау нигезләрен өстәү турында тәкъдим белән мөрәҗәгать юллаган. Бу хакта «РИА Новости» хәбәр итә.

Ләмбрә мәчете каршындагы җәйге мәйданчыкта катнашучылар Саранскида урнашкан Хәрби һәм хезмәт батырлыгы мемориаль музеенда булды. Бу хакта Россия мөфтиләре шурасы хәбәр итә.

Россия бакчачылары тыелган үсемлекләр үстергән өчен 300 мең сумга кадәр штраф алырга мөмкин. Мондый үсемлекләр арасына шалфей һәм кыр бөтнеге керә, дип сөйләгән «РИА Новости»га Г.В. Плеханов исемендәге Россия икътисад университеты гражданлык-хокукый дисциплиналар кафедрасының өлкән укытучысы Ольга Чирикова.

27 июль көнне Балтач районы Бөрбаш Сәрдегәне авылында V мәртәбә Чишмә көне «Нурзидә» бәйрәме узачак. Бу хакта Бөтендөнья татар конгрессы матбугат хезмәте хәбәр итә.

Пәнҗешәмбе көнне, 25 июльдә, Татарстанда бераз яңгыр, урыны белән яшен булачак.

Татарстан Премьер-министры урынбасары, Бөтендөнья татар конгрессының Милли Шура рәисе Васил Шәйхразыев Омск өлкәсенә эш сәфәре барышында Тара шәһәрендәге Татар мәдәни үзәге активы белән очрашты. Биредә Татарстан кунакларын җырлар һәм биюләр белән каршы алдылар, экскурсия уздырдылар, дип хәбәр итә конгресс сайты.

Кабан күле яр буенда «Хәрәкәттә – бәрәкәт» проектының чираттагы чарасы узачак, анда «Кичке уен» бию-музыкаль тамашасы күрсәтеләчәк.

22 июльдә Зәйнең туган як тарихын өйрәнү музеенда «Казан Идел буе халыкларының традицион костюмы» проекты төркеме булды. Бу хакта «Зәй офыклары» газетасы яза.

Баулы районының Яңа Чүте авылындагы Зур Чишмә территориясен төзекләндергәннәр. Зур Чишмәне карап, чистартып торуга авыл халкы, мәктәп укучылары һәм авыл мәдәният йорты хезмәткәрләре зур өлеш кертә. Бу хакта «Хезмәткә дан» газетасы яза.

Кукмараның ЗАГС бүлегендә «Россия йөрәге» гаилә учагы капсуласын тантаналы рәвештә Теләче районына тапшырдылар. Бу хакта «Хезмәт даны» газетасы яза.

Яшел Үзәндәге «Татар авылы» ачык һавадагы музеенда 2024 елның 1-10 августында «Көчле традицияләр» проектын гамәлгә ашыра. Бу хакт «Яшел Үзән» газетасы яза.