Новости за 10.07.2024

Теләче муниципаль район башлыгы Нәҗип Хаҗипов махсус хәрби операциясе зонасына барган. Анда ул гуманитар ярдәм тапшырган. Бу хакта район башлыгы телеграм-каналында яза.

Татарстанның Кама Тамагы бистәсе янындагы авиаһәлакәттә исән калган кешенең хәлен табиблар авыр дип бәяли. ТР Сәламәтлек саклау министрлыгының матбугат хезмәтендә «Татар-информ» агентлыгына шулай дип белдерделәр, дип яза «Татар-информ» хәбәрчесе Эвелина Киселёва.

Россиядә яңа өйләрдән фатир сатып алганда яки шәхси торак йорт төзегәндә 6 процент ставканы күздә тоткан «Гаилә ипотекасы» программасы РФ Президенты Владимир Путин күрсәтмәсе белән 2030 елга кадәр озайтылды. Бу хакта РФ Финанс министрлыгының матбугат хезмәте хәбәр итә.

Бүген, 10 июльдә, РФ Дәүләт Думасы шул исәптән физик затлар кеременә салым буенча прогрессив шкала кертүне күздә тоткан салым системасын җайга салып бетерү турындагы законны өченче, соңгы укылышта кабул итте. Бу хакта ТАСС агентлыгы яза.

Идел буе транспорт прокуратурасы Татарстан Республикасының Кама Тамагы районында җиңел моторлы самолетның һәлакәткә юлыгуына бәйле факт буенча тикшерү эшен башлады.

Татарстанның Кама Тамагы районында җиңел моторлы самолет һәлакәткә очрый. Беренчел мәгълүматлар буенча, һәлакәт нәтиҗәсендә өч кеше һәлак була, тагын берсе зыян күргән.

Татарстанга эш сәфәре белән РФ гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министры Александр Куренков килде. Казан Халыкара аэропортында аны ТР Рәисе Рөстәм Миңнеханов каршы алды, дип хәбәр итә республика җитәкчесенең матбугат хезмәте.

Төркиянең Анталья шәһәреннән Казанга рейс ясаучы «Азур Эйр» авиакомпаниясенең пассажир самолеты кичә кич Самараның Курумоч аэропортына төшкән. Моның сәбәбе – һава судносының техник яктан төзек булмавы. Очкычта 339 пассажир һәм 10 экипаж әгъзасы булган.

В.Г.Тимирясов исемендәге Казан инновацион университеты вәкиле Илдар Бигишев 2024 елда Г.Р.Державин исемендәге Республика премиясе лауреаты булды. Ул «Робототехниканы җинаять-хокукый яктан җайга салу» темасына үткәрелгән тикшеренүе өчен җиңү яулады.

Дәүләт думасының мәгариф комитеты җитәкчесенең беренче урынбасары Яна Лантратова ата-аналары инвалид булган студент-отличникларга стипендия арттырырга тәкъдим итте. Бу хакта РИА Новости яза.

Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев эш сәфәре белән Омск өлкәсендә. Биредә ул II Халыкара Иртыш Сабан туе узачак «Яшел утрау» паркын карады, дип хәбәр итә конгресс сайты.

Бүген, 10 июль көнне, Татарстанда урыны белән кыска вакытлы яңгыр, яшенле яңгыр явачак, дип фаразлый ТР Гидрометүзәге.

3 июль көнне Буа шәһәренең академик Сәгъдиев исемендәге мәктәпнең «Сәнгатьне күрү» музеенда әдәби очрашу булды, дип хәбәр итә ТР Язучылар берлеге матбугат хезмәте.

Республикада «Иң яхшы билингваль балалар бакчасы» грантына конкурс үтте. Грантның максаты – мәктәпкәчә белем бирү оешмаларында билингваль белем бирүне оештыру процессын камилләштерү. Ике этапта үткән бәйгедә Мөслимнең «Ләйсән» гомумүстерелешле балалар бакчасы да катнашты. Бу хакта «Мөслим-информ» яза.

Чүпрәле районы Каракитә мәчетеннең 30 еллыгын уздырдылар. Чарада 200ләп кеше катнашты, дип яза «Туган як» газетасы.

Кичә Балтач районында «кыр кораблары»ның урып-җыю чорына әзерлеген тикшерү, ягъни комбайннар парадының икенче көне «Яңа тормыш» хуҗалыгында дәвам итте. Бу хакта «Хезмәт» газетасы яза.

Әлмәттә 21 мәктәпне 750 укучы тәмамлаган. Алтын медальләрне 89 чыгарылыш укучысы, көмеш медальләрне 104 укучы алды. Бу хакта гомумшәһәр планеркасында район мәгариф идарәсе начальнигы Ирина Павловская хәбәр итте, дип яза «Әлмәт таңнары» газетасы.

Азнакай шәһәрнең «Юбилейный» стадионында «Әти, әни, мин – дус һәм спорт сөюче гаилә» район бәйгесе кысаларында гаиләләр ГТО нормативларын тапшырдылар. Бу хакта «Маяк» газетасы яза.