Новости за 01.07.2024

Россиядә объектларның террорчылыкка каршы саклануын бозган өчен җинаять җаваплылыгы кертелде. Документ 2024 елның 1 июлендә үз көченә керде, дип хәбәр итә ТАСС.

ТР Рәисе каршындагы Дәүләт торак фонды 2024 елда Татарстанда яшәүче 3 299 гаиләне арзан һәм уңайлы торак белән тәэмин итәргә планлаштыра. Бүгенге көндә 56 күп фатирлы йортның 27се, барлыгы 1 911 фатир файдалануга тапшырылган – бу еллык планның 69,5 проценты.

Яшьләр эшләре буенча федераль агентлык («Росмолодёжь») оештырган «Игелекле эшләр төбәге» федераль конкурсында Татарстан алтынчы ел рәттән җиңүчеләр исемлегенә керде. Быел республикага волонтерлык хәрәкәтен үстерүгә 6 миллион сумнан артык акча биреләчәк, дип хәбәр итә ТР Яшьләр министрлыгының матбугат хезмәте.

Алексеевск-Әлмәт тиз йөрешле түләүле трассасының 70 проценттан артыгы төзелгән. Бу хакта Татарстан Республикасы Рәисе Рөстәм Миңнеханов төзелә торган юл буйлап сәфәрдән соң Тelegram-каналында сөйләде.

30 июньдә Чечня башкаласында узган Сабантуй шәһәрнең үзәк мәйданында 10 меңгә якын кешене җыйган. Бу хакта Чечня башлыгы Рамзан Кадыров үзенең телеграм-каналында сөйли.

Франциядә парламент сайлауларының беренче нәтиҗәләре игълан ителгәннән соң, Парижда башланган митинг вакытында black bloc хәрәкәте активистлары кафе витриналарын җимерергә һәм чүп контейнерларына ут төртергә керешкән. Бу хакта «РИА Новости» хәбәр итә.

Рафаэль Усманов ТР буенча Эчке эшләр министрлыгының Икътисади куркынычсызлык һәм коррупциягә каршы тору идарәсенең яңа башлыгы итеп билгеләнде. Бу хакта мәгълүмат ведомство сайтында чыкты.

Ютазы районының Әбсәләм авылында үткән 2нче төбәкара «Кымыз бәйрәме» фестивалендә Башкортстаннан да катнашучылар бар иде. «Башкорт кымызы» җәмгыяте җитәкчесе Рушан Нәбиуллин бәйрәмнең халыклар дуслыгын, милләтләр бердәмлеген исбат итүен әйтте.

Татарстан Республикасының «Татар-информ» мәгълүмат агентлыгы журналисты – смм-белгече Милена Новикова республика күләмендә уздырыла торган «Керәшен чибәре – 2024» бәйгесенең финалына үтте.

Бүген Татарстанда һава температурасы +31 градуска кадәр күтәреләчәк. Алмашынучан болытлы һава торышы көтелә, көндез урыны белән кыска вакытлы яңгыр, яшен була, дип хәбәр итә ТР Гидрометеорология үзәгенең матбугат хезмәте.

Татарстан Республикасы Рәисе Рөстәм Миңнеханов, тугандаш Республика Сабантуй кабул итү сәбәпле, Чечня башлыгы Рамзан Кадыровка рәхмәт белдерде. 30 июньдә Грозныйда беренче тапкыр милли татар бәйрәме узды.

Бүген Баку марионеткалар театрының «Аршин мал алан» спектакле белән «Шомбай-FEST» халыкара курчак театрлары фестивале төгәлләнә.

Быел июньдә ГТО республика операторы Гаилә елына багышлап уздырган «Хәрәкәттә бәрәкәт» акциясен җиңүчеләре билгеле. Бу турыда Татарстан Спорт министрлыгы хәбәр итте.

Ульяновск өлкәсенең «Өмет» газетасында «Телне тыю – изге гамәл» дигән язма чыкты. «Дин дәресләре мәктәбе» җитәкчесе Асия хаҗия Мөлекова язган.

30 июнь көнне Грозный шәһәрендә «Сабантуй» милли бәйрәме узды. Сабантуй – Татарстан белән Чечня арасындагы дуслыкны ныгытучы чара. Киләсе елда да Чечня Республикасында милли бәйрәмне үткәрү планлаштырыла. Ул Чечня Республикасының Шелково районында оештырылачак. Бу турыда Бөтендөнья татар конгрессы хәбәр итте.

Питрәч районында эшмәкәрләр арасында социологик сораштыру узды. Чара «эшлекле» коррупция дәрәҗәсен бәяләү өчен үткәрелде. Бу хакта «Алга» сайтында Ольга Шәмсетдинова хәбәр итә.

Аксубай районы вәкилләре мөгезле эре терлекләрне ясалма орлыкландыру буенча 46нчы республика операторлар конкурсында лаеклы чыгыш ясады. Алар – ветеринария табибы, Ибрай ветеринария участогы мөдире Рөстәм Мотыйгуллин һәм «Молко» ҖЧҖ ясалма орлыкландыру буенча оператор Андрей Ижотов. Бу хакта «Авыл таңнары» хәбәр итә.

Татарстан Рәисе ярдәмчесе, Татарстанның «Беренчеләр хәрәкәте» балалар һәм яшьләр гомумроссия иҗтимагый-дәүләт хәрәкәтенең төбәк бүлеге советы җитәкчесе Тимур Сөләйманов Чүпрәле районында булды. Ул «Акчарлак» лагерының икенче сменасын ачу тантанасында катнашты. Бу хакта «Туган як» сайтында Ранилә Алиуллова хәбәр ителә.