Дархан этээччи Валентин Хорунов: Оһуохай утумун салҕыахпыт! Оһуохай күнүн көрсө Сунтаартан төрүттээх Саха Өрөспүүбүлүкэтин Дархан этээччитэ Валентин Хорунов Оһуохайы утумнуурга туох үгэс баарын сиһилии билиһиннэрдэ: — Мин 1960 сыллаах Сунтаар улууһун Түбэй нэһилиэгэр күн сирин көрбүтүм. Бу нэһилиэккэ Аар тайҕа ырыаһыта Сергей Афанасьевич Зверев — Кыыл Уола төрөөбүтэ.Түбэй оччотооҕуга, сэрии кэмин кэнниттэн Оһуохайы улаханнык өрө […]
Сообщение Дархан этээччи: Сунтаар улууһа Оһуохайа суох сатаммат! появились сначала на Сетевое издание SAKHALIFE.RU.
Дархан этээччи Валентин Хорунов: Оһуохай утумун салҕыахпыт!
Оһуохай күнүн көрсө Сунтаартан төрүттээх Саха Өрөспүүбүлүкэтин Дархан этээччитэ Валентин Хорунов Оһуохайы утумнуурга туох үгэс баарын сиһилии билиһиннэрдэ:
— Мин 1960 сыллаах Сунтаар улууһун Түбэй нэһилиэгэр күн сирин көрбүтүм. Бу нэһилиэккэ Аар тайҕа ырыаһыта Сергей Афанасьевич Зверев — Кыыл Уола төрөөбүтэ.
Түбэй оччотооҕуга, сэрии кэмин кэнниттэн Оһуохайы улаханнык өрө туппут нэһилиэк буолар. Ытык кырдьаҕастарбыт, эбээлэрбит, эһээлэрбит, ийэлэрбит, аҕаларбыт, бары Оһуохай куттаах дьон этилэр.
Мин бэйэм Оһуохайы билэн улааппытым диэххэ наада, ийэм Елена Александровна — Чуораан Дэлиэнэ норуокка биллэр оһуохайдьыт, ырыаһыт этэ.
Эбэн эттэххэ Сунтаар улууһа Оһуохайа суох сатаммат, туох баар тэрээһин — Ыһыах буоллун, араас бырааһынньыктар, бэл диэтэр дьокутааттары талыы, барыта Оһуохайа суох сатаммат.
Кырдьаҕас саастаах оһуохайдьыттарбыт, бэйэлэрэ көрөн, бу оҕо маннык талааннаах, оһуохайга барыыһык диэн уһуйаллара. Ити биһиги норуоппут урут уруккуттан бэйэтэ илдьэ кэлбит үөрэҕэ, суруллубатах сокуона буолар.
Үөрэтэн, такайан, ыччаты чугаһатан, биһиги кэннибититтэн эһиги көлүөнэ хаалаҕыт диэн сыаллаах — соруктаах этилэр.
Ол курдук ыччаттан ыччакка, көлүөнэттэн көлүөнэҕэ бэриллэн иһэр, биһиги эмиэ кэлэр саҥа ыччакка эмиэ үгэс курдук туттарыахтаахпыт.
Оһуохай киэҥ суолтата дириҥ, ол иһин оҕону уһуйаантан саҕалаан үөрэтиэххэ сөп, саха оҕото норуот үҥкүүтүгэр олох чугас эбит диэн бэлиэтии көрбүтүм, ылынара түргэн, бэйэтэ көрө сылдьан түргэнник үөрэнэр, сайдар, удьуор утумун салҕыыр, талааннаах оҕону таба көрөн Оһуохайга эрдэттэн киллэриэххэ наада.
Оһуохай кэнники кэмҥэ бу Өрөспүүбүлүкэҕэ, Дьокуускайга, улуустарга даҕаны, биллэрдик сайдан иһэр, аһара баран эттэххэ, аан дойдуга таҕыста. Тас дойдулар омуктара биһиги Оһуохайбытын сөҕөннөр, тылбытын билбэтэллэр да, үҥкүүбүт хамсаныытын сөҕүмэр тургэнник ылыналлар. Мин аҕыйах сыллааҕыта Польша Варшава куоратыгар, Хабаровскайга бара сылдьан, Оһуохай күүстээх ситимнээҕин, араас норуоту, дьону түмэн биир улахан аан дойду хамсаныыта буоларын бэлиэтии көрбүтүм.
Ыам ыйын 25 күнүгэр Оһуохай күнүгэр барыгытын улахан Ытык Оһуохайдарга ыҥырабыт!
Сообщение Дархан этээччи: Сунтаар улууһа Оһуохайа суох сатаммат! появились сначала на Сетевое издание SAKHALIFE.RU.