Kreml nezareti altındaki Aqyar gubernatorı Dmitriy Ovsânnikov, Keriç köprüniñ oktâbr 1-inde açılğan yük naqlitatı yürüşi, “Aqyar fiyatlarını, naqil masrafları azlaşqanı sebebinden, eksiltmege imkân berir” dep saya.
“Elbette, Qırım köpründen furalarnıñ keçmesi açılğanınen fiyatlarnı eksiltmek mümkün olur dep ümüt etemiz. Fiyat eksiltmesi naqil masraflarına bağlı: şimdi Qırım köprü quruldı, soñ “Tavrida” trassası bitirilir, soñra ise demir yolu bir nizamğa ketirilir. Böyleliknen, naqil masrafları eksilgeninen, erzaq teslimatı da ucuzlanır ve fiyatlar eksilir”, - Ovsânnikovnıñ sözlerinden yaza “TASS”.
Oña köre, erzaq ve başqa mallarnıñ fiyatına bütün teslimat silsilesi tesir ete, bunıñ içün, yollardan başqa, logistik merkezlerni ve başqa infratertipni qurmağa kerek.
Bir kün evel haber etildi ki, Keriç köprüniñ yük naqliyatı yürüşi açılğanından soñ da, işğal etilgen Qırımda benzin fiyatı artmaqta.
Bundan evel Qırımnıñ rusiye başı Sergey Aksönov, Keriç boğazından köprüniñ yük naqliyat qısmınıñ açılışı “Qırım fiyatlarına duyulacaq şekilde tesir etmez” dep bildirdi.
Qırımdaki rusiye akimiyetiniñ başı qayd etti ki, Qırımda yaqarlıq fiyatları Keriç köprüniñ demiryol qısmı açılğanından soñ baqılacaq.
Evel haber etilgeni kibi, bazarertesi künü, oktâbr 1-inde, saat 00:00-den Keriç köprüniñ yük naqliyatınıñ yürüşi içün qısmı açıldı.
Keriç boğazı üzerindeki köpürniñ avtoyol qısmı yengil avtomobillerniñ areketi içün mayıs 16-da açıldı. Köpürniñ demiryol qısmı şimdilik qurulıp bitirilmedi.
Ukraina prezidenti Petro Poroşenko, Rusiye tarafından ilhaq etilgen Qırımda Keriç köprüniñ qanunsız qurulması Kremlniñ halqara uquqqa itibar etmegeniniñ nevbetteki şaatlığıdır, dedi.
Avropa Birligi ve AQŞ Rusiye territoriyası ile ilhaq etilgen Qırım arasında Keriç köprüniñ qısmen açılmasını sert bir şekilde tenqit etti. Ukraina tarafı Rusiye ile köpürniñ qurulması aqqında añlaşmadan 2014 senesinde – Qırım Rusiye tarafından ilhaq etilgen soñ çıqtı.
