Ukraina Yuqarı Radasınıñ insan aqları vekâletlisiniñ ofisi işğal etilgen Qırımda mahküm etilgen Vladimir Baluhqa qoltutuv online aktsiyasını başlattı. Bu aqta ombudsmenniñ matbuat hızmeti bildire.
«Vladimir Baluh 200 künden berli açlıq tuta. Ukrainalılar ğayretlerini birleştirip, siyasiy mabüske qoltutsınlar isteymiz. Özümizden başlaymız… Vladimir Baluhqa qoltutmağa isteseñiz – saifeñizde 200 arif yazıñız. Yazınıñ başında Baluhiçün200arif heştegini qoyuñız», – dep aytıla ilânda.
Qırımda mahküm etilgen ukrain faali Vladimir Baluh 200 künden berli açlıq tuta. Advokat Dmitriy Dinzeniñ malümatına köre, Baluhnıñ ülseri ya da pankreatiti açılğanına şübe bar.
Kreml nezaretindeki Qırım Yuqarı mahkemesi 5 yılğa mahküm etilgen Vladimir Baluhnıñ ükmüni qısmen yımşatıp, onı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
