Qırımtatar halqınıñ lideri, Ukraina halq deputatı Mustafa Cemilev, iyülniñ 9-nda Aqyarda çıqış yapqanda, «Qırımtatar Milliy Meclisi areketlerinden dolayı yarımadada iqrarsızlıq telükesi olabile» dep aytqan Rusiye Havsızlıq Şurasınıñ kâtibi Nikolay Patruşevniñ sözlerini izaatlar eken, ilhaq etilgen Qırımda Rusiye qırımtatarlarğa qarşı yañı provokatsiyalar azırlay bile dep ayttı.
TASS haber etkenine köre, Patruşev ayrıca, «Qırımdaki işbu iqrarsızlıq telükesi» Ukraina devletiniñ başında turğan siyasiy küçlerniñ, hususan, ukrain milletçileriniñıntıluvlarınen bağlı dep ayttı.
Ondan da ğayrı, onıñ sözlerine binaen, Qırımtatar Milliy Meclisiniñ areketleri de ayrı bir qorqular yarata eken.
«Radikal niyetli Qırımtatar Milliy Meclisiniñ liderleri (...) provokatsion areketlerge, şu cumleden diversion-terroristik eylemlerge azır olğanılarını bildire», – dep ayttı Patruşev.
Qırım.Aqiqatqa bergen izaatında Mustafa Cemilev bu qabaatlavlarnı inkâr etti.
«Qırımtatar Milliy Meclisi Qırımda «iqrarsızlıq berecek» iç bir eylem ötkermege planlaştırmadı ve planlaştırmay. Er alda olar (Kreml – QA) ilhaq etilgen Qırımda qırımtatarlarğa qarşı bir şey azırlaylar», – dedi Cemilev.
İyülniñ 9-nda Qırımğa Rusiye Havsızlıq Şurasınıñ kâtibi Nikolay Patruşev kelip çıqtı. Rusiye Havsızlıq Şurasınıñ matbuat hızmeti bildirgenine köre, Aqyarda toplaşuv Rusiye prezidenti Vladimir Putinniñ avalesinen «regionlar, nazirlikler ve muessise yolbaşçılarınıñ» iştirakinen keçe.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirip başl
