Rusiye nezareti altındaki Qırım Yuqarı mahkemesi iyülniñ 9-nda qırımtatarlalarnıñ sürgün hatırasına bağışlanğan tedbir iştirakçisi Seytasan Asanovnıñ davasını toqtataraq, yarımadanıñ Rusiye politsiyası oña qarşı bergen apellâtsion şikâyetini qanaatlendirmedi. Bu aqta Qırım.Aqiqat muhbiri haber etmekte.
Dava materiallarınıñ baqıluvı ve şaatlarnıñ sorğulanuvı esnasında mahkeme Merkeziy rayon mahkemesiniñ qararı esaslı ve qanuniy olğanını, em de Seytasan Asanovnıñ areketlerinde qanun zıt kelgen arketler olmağanını qarar bererek, davanıñ toqtatılacağına dair qarar çıqardı.
«Dava materiallarında mevcut raportlarda, menim imayem altındaki şahıs transport areketini bloklağanı, faqat politsiya hadimleri sorğulanğanda işbu vaziyet tasdıqlanmağanı aqqında aytıla. Şaatlıqlarda o yalıñız saaatlıq yapmaq içün olarnen beraber barmağa razı olmağanı aqqında aytılmaqta. Böyleliknen mahkeme, politsiyanıñ Merkeziy rayon qararına qarşı bergen şikâyeti esassız olğanını, şu sebepten davanı toqtataraq, Asanovnı aqlap çıqtı degen hulâsağa keldi», – dep ikâye etti Seytasan Asanovnıñ adliyecisi Nazim Şeyhmambetov.
Seytasan Asanov mayısnıñ 17-nde aqşam keç maalde Aqmescitte qırımtatarlar toplu yaşağan Aq-Meçet rayonında keçken qırımtatarlarnıñ sürgüni hatırasına bağışlanğan tedbirden soñ tutulıp alınğan edi.
Olar arasında çağına yetmegen balalarnen beraber tutulğan yigirmige yaqın kişini beş polis maşinası ile Aqmescitniñ çeşit içki işler bölüklerine alıp ketken ediler.
Daa soñra tutulğanlarnıñ bazıları, başta añlatuvlarını, parmaq izlerini ve DNE nümunelerini alınaraq, yiberildi.
Mayısniñ 18-nde Kreml nezareti altındaki Aqmescit Merkeziy rayon mahkemesi Seytasan Asanovğa dair «polis hadiminiñ qanuniy talaplarına boysunmağanı aqqında cinaiy işniñ yürütilmesini, cinayet terkibiniñ olmağanı sebebinden toqtattı».
Qırımtatar halqını Qırımdan sürgün etüv qurbanlarınıñ hatıra künü er yıl mayısnıñ 18-nde qayd etile. Şu künü qırımtatarlar tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
