Mayıs 21-de Bağçasarayda faaliyetçiler Server Mustafayev ve Edem Smailovnıñ evlerini tintken Rusiye telükesizlik hadimleri imayeleri altında olğanlarğa advokatlarnı yibermeyler. Bunı Emil Kurbedinov ve Ayder Azamatov Facebookta bildirdiler.
Kurbedinov: «Rusiyeniñ Cinaiy protsessual kodeksi bozularaq, men, S.R. Mustafayevniñ advokatı sıfatında, (tahminen) Ekstremizmge qarşı merkez ve FSB hadimleri tarafından tintüv yapılğan yerde bulunğan muvekkilim yanına yiberilmedim. Bu, imaye etilmek aqqınıñ ciddiy bir bozuluvıdır. Yuqarıda bildirilgen faktlar boyunca munasip teşkerüv keçirmekni ve prokuraturanıñ qarşılıq kösterüvi çarelerini körmege rica etem. Ondan ğayrı, men Qırım prokuraturasınıñ resmiy saytlarında bildirilgen telefon nomeraları boyunca nevbetçi prokuror ve prokuraturanıñ qabulhanesi ile bağlanıp olamadım», – dep yazdı.
Öz nevbetinde advokat Ayder Azamatov da, imayesi altında olğan şahısqa yiberilmegeni içün Rusiye prokuraturasına şikâyet etkenini bildirdi.
Azamatov: «İmayem altında olğan Edem Smailovnıñ evi yanında bulunam, Topçuköy (Dolinnoye). Tahqiqatçınıñ maña çıqmasını ve yiberlmegenimniñ sebebini añlatmasını rica etem. Cevap aldım – o, meşğul, yaza. Bu fakt boyunca elektron qabulhane vastasınen Qırım prokuraturasına, imaye etilmek aqqınıñ bozuluvı ve uquqiy yardım kösterilmesi içün advokatnı yibermemek qanunsız olğanı aqqında şikâyet yolladım», – dep yazdı.
Daa evel Rusiye telükesizlik hadimleriniñ Qırımda tintüv yapqanları aqqında bildirilgen edi. Şu cümleden, Bağçasarayda «Qırım birdemligi» birleşmesiniñ koordinatorlarından biri Server Mustafayev ve Bağçasaray rayonınıñ Topçuköy (Dolinnoye) köyünde Edem Smailovnıñ evleri tintildi.
Federal telükesizlik hizmeti, Qırımda, Rusiye ve ilhaq etilgen yarımadada yasaq etilgen «Hizb ut-Tahrir» teşkilâtında iştirak etkenlerinden şübhe etilgen eki kişiniñ yaqalanğanını iddia ete. Yaqalanğanlarnıñ adları bildirilmey.
Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar olğanını ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri taqip etilgenini qayd eteler. Halqara uquq, işğal etilgen territoriyada işğalci devletniñ qanunlarını tatbiq etmekni yasaq ete.
