Ukraina Telükesizlik hizmetinde (SBU), Rusiyeniñ 2018 senesiniñ küzünde Ukraina territoriyasına ordusını kirsetmek içün sebepler yaratmaq planları aqqında malümat bar. Bunı aprel 13-te Kyivde SBU reisiniñ muavini Viktor Kononenko bildirdi.
Onıñ aytqanına köre, Rusiye ukümeti, rus tilini qorçalamaq maqsadınen teşkil etilecek tedbirlerniñ iştirakçilerini urmaq içün cinayetçiler ve «tituşkalar»nı celp etmekni planlaştıralar.
«Tedbir artıq küzge planlaştırıla. Lâkin biz bu planlarnıñ ömürge keçirilmesine yol bermeycekmiz», – dedi Kononenko.
Aynı zamanda, Kyivdeki telükesizlik forumında Milliy telükesizlik ve mudafaa şurasınıñ (SNBO) kâtibi Aleksandr Turçinov, Rusiyeniñ ilhaq etilgen Qırım, Donbassnıñ işğal etilgen territoriyası ve Ukraina ile sıñırında çoq biñlik arbiy küçler azırlağanını bildirdi.
Daa evel, bu aynıñ içinde Ukraina prezidenti Petro Poroşenko, Berlinde Angela Merkel ile körüşüvinden soñ, Ukraina apishanelerinde, Rusiyeniñ «olar anda yoqlar» degen 23 Rusiye askeri ve zabitiniñ bulunğanını bildirdi.
Ukraina mudafaa naziri Stepan Poltorak ise, Rusiyeniñ Ukraina ile sıñırında 77 biñden ziyade kişilik ordu toplağanını beyan etti.
