2017 senesinde Aqyar ealisiniñ artuvı qararnen 9 biñ kişini teşkil etti. Bunı Kremlniñ kontroli altında olğan Krımstat bildire.
Muessiseniñ bildirgenine köre, 2000 senesinden başlap şeerde ealiniñ migratsion artuvı közetile. Bunıñ sayesinde 17 yıl içinde şeerniñ ealisi 57,2 biñ kişige arttı. Şu cümleden 2017 senesinde migratsiya saldosı 8,7 biñ kişini teşkil etti.
Bildirüvde: «2017 senesinde migratsiyanıñ bütün ceryanları boyunca kelgenlerniñ sayısı 20205 kişi ve ketkenlerniñ sayısı 11472 kişini teşkil etti. Migratsion artuv em şeer ve qasabalarda, em de köylerde qayd etildi, munasip şekilde – 8717 kişi ve 16 kişi», – denile.
Bildirilgenine köre, 2014-16 seneleri arasında Aqyarğa 61,9 biñ kişi keldi. Bu, 2015 senesinde migratsion artuv koeffitsientini 438,7-ge qadar arttırdı. Migrantlarnıñ mutlaq çoqluğı (74%) Rusiyeden keldi. Aynı zamanda şeerni 17432 yerli sakini terk etti.
Tetqiqatlarnıñ neticesine köre, 2014-2016 yılları arasında Qırım territoriyasına 109 biñ kişi keldi. Aynı zamanda mutlaq çoqluq qomşu Rusiyeden keldi – 70,2 biñ kişi ya da migrantlarnıñ 64%-i. Resmiy statistikağa köre, aynı muddet içinde 65,3 biñ kişi Qırımnı terk etti.
Kremlniñ kontroli altında olğan Qırım başlığı Sergey Aksönov 2017 senesi noyabrniñ 16-sında Rusiyeniñ terrorizmge qarşı komissiyası azalarından ilhaq etilgen Qırımdaki migratsion ceryanlar üzerinde kontrolni arttırmaq talap etti.
