İlhaq etilgen Qırımnıñ sabıq prokurorı, şimdi Rusiye Devlet dumasınıñ deputatı Natalya Poklonskaya yañı Rusiye silâlarına berilecek adlar içün öz variantlarını teklif etti. Bu silâlar aqqında Rusiye prezidenti Vladimir Putin martnıñ 1-nde Federal toplaşuvğa yönetilgen mesajında ikâye etti.
Poklonskayanıñ fikrine köre, arbiy lazer kompleksiniñ adını «Krım» ve pilotsız suvaltı apparatınıñ adını «Sevastopol» qoyılmaq kerek.
Bunı sabıq prokuror özüniñ Facebooktaki saifesinde yazdı.
Daa evel Rusiye Mudafaa nazirligi resmiy saytında eñ yañı Rusiye silâları içün ad teklifleriniñ qabul etilmesini ilân etti.
Martnıñ 1-nde Rusiye prezidenti Vladimir Putin, Federal toplaşuvğa yönetilgen mesajında, Rusiyede qanatlı raketalar içün raketalarğa qarşı mudafaa sistemaları tarafından zararlanmaz, üstün quvetke malik olğan kompakt bir nükleer energetik tertibatnıñ işlep çıqarılğanını bildirdi. Rusiye prezidenti yapqan çıqışınıñ aman-aman yarısı raketalarğa bağışlanğan edi. O, AQŞnıñ Rusiye ile raketalarğa qarşı mudafaa aqqında muzakereler yapmaq istemegenini söyledi.
