Qırımda QMC Yuqarı Radasınıñ binası yanındaki 2014 senesi fevral 26 mitinginde Rusiye tarafını tutqan faaliyetçilerniñ saflarında Rusiye arbiy hadimleri buluna edi. Bunı QMC prokurorı Gündüz Mamedov, bu vaqialarnıñ tahqiqat etilüvi ketişatını bildirgende söyledi.
QMC Prokuraturasınıñ matbuat hizmeti, muessisede Yuqarı Radanıñ divarları altındaki vaqialarnıñ ketişatı daqiqa daqiqasına tayin etidi, dep bildire.
Muhtariyetniñ prokurorı: «Yarımadanı Ukrainadan ayrmaq şiarları altında turıp, Rusiyege qol tutqan faaliyetçilerniñ tarafında, daa soñra ava limanları, memuriy binalar ve arbiy qısımlarnıñ zaptında faal surette iştirak etken, kiyimlerini deñiştirgen Rusiye Federatsiyası ordusınıñ arbiyleri turğanı, muim bir fakttır. Ondan ğayrı, Ukrainanıñ topraq bütünligine qol tutmaq içün yapılğan barışıqlı mitingde Kuban qazaqları buluna edi. Şunu qayd etem ki, bu eki şahıslar kategoriyasınıñ, yarımada sakinleri tarafından iradeniñ ifade etilmesine iç bir alâqası yoqtır», – dedi.
Mamedov, QMC Prokuraturasınıñ, o künü cemiyet nizamınıñ qoruvını temin etken uquqqoruyıcı organlarnıñ hadimleri tarafından, fizikiy zorbalıq qullanıp ve vatandaşlarnı köteklep, Ukrainanıñ topraq bütünligine qol tutuv mitingleriniñ ötkerilmesine qanunsız olaraq keder etüv ve öz vazifelerini munasip şekilde eda etmeme faktları boyunca cinaiy işte rehberlik yapqanını hatırlattı.
Mahkemeden evelki tahqiqat Milliy polisniñ QMC ve Aqyardaki Baş idaresi tarafından yapıla.
Muessisede, bugünge qadar uquqqoruyıcı organlarnıñ üç rehberine, Ukraina Cinaiy kodeksiniñ 367-nci maddesiniñ 2-nci qısmında qayd etilgen cinayetniñ işlegeninden şübheli olğanları aqqında bildirildi. Olarnıñ qıdırılması ilân etildi. Tahqiqat, mitingde cemiyet nizamınıñ qoruvını temin etüv boyunca vazifeleriniñ eda etilmesine lâqaydlıq ile yanaşuvları sebebinden taraflar arasında çarpışmalar oldı, ve olarnıñ neticesinde 16 kişiniñ beden yaraları körgenini ve 2 kişiniñ elâk olğanını tayin etti.
Ukrainada fevral 26 künü, Qırımnıñ Rusiye işğaline qarşı muqavemet künü olaraq tayin etildi. 2014 senesi bu künde Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen miting ötkerildi. O künü miting iştirakçilerine qarşı Rusiye tarafını tutqan ve şu cümleden «Rusiye birligi» fırqasına ait faaliyetçiler tura edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
