Türkiye Büyük Milliy Meclisiniñ Milliy müdafaa meseleleri boyunca komitetiniñ azaları ve Türkiye-Ukraina dostluğı grubunıñ azaları Ukraina Yuqarı Radasınıñ Türkiye Cumhuriyeti ile parlamentlerara münasebetleri boyunca deputatlar eyetiniñ yolbaşçısı Boris Tarasük ile körüşüvleri esnasında: Türkiye Cumhuriyeti, Ukrainanıñ topraq bütünligi, suverenitetiniñ tiklenilmesi ve Qırım ilhaqınıñ tanılmamasına dair münasebetini deñiştirmedi, – dep bildirdiler.
Yanvar 26-da Yuqarı Radanıñ saytında bildirilgenine köre, körüşüv esnasında taraflar iqtisadiyat ve arbiy tehnika saalarında emekdaşlıqnı quvetleştirmekniñ emiyeti aqqında fikir paylaştılar. Bildirüvde, devletler arasında mal dönümini arttıruv perspektvası ayrıca qayd etildi, denile.
Terrorizm ile küreşke ayrıca diqqat etildi. Ondan ğayrı, taraflar Suriyedeki vaziyetni ve Ukraina ile Türkiye arasında Serbest ticaret zonası aqqında muqaveleni imzalamaq imkânını muzakere ettiler.
Matbuat hizmetinde, Ukraina tarafı, Ukraina-Türkiye munasebetleriniñ kelecekte derenleştirilmesine ümüt bildirdi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
