Avropada telükesizlik ve emekdaşlıq boyunca teşkilât yanında AQŞ işlerinde muvaqqat vekil Harri Kamian Rusiye tarafından ilhaq etilgen Qırımdaki vaziyetke dehşetli dedi. Yanvarniñ 25-nde Venada OSCEniñ Daimiy şurasıda yapqan çıqşta o, Rusiyeni halqara mecburiyetlerini eda etmege, yarımadağa halqara közeticilerni yibermege, qırımtatarlar ve diger faaliyetçilerniñ taqiplerini toqtatmağa ve em de «Qırımnıñ işğalini toqtatmağa» davet etti.
Kamian: «Ükümetke bağlı olmağan Freedom House teşkilâtı Rusiye tarafından işğal etilgen Qırımnı dünyada temel ürriyetlerni ayatqa keçirmek içün eñ fena şartları olğan bölgeler sırasına kirsete. Rusiyede ve Rusiye tarafından işğal etilgen Qırımda işğalğa qarşı çıqqanlar taqip etile. Qoşma Ştatları, qırımtatarlarğa akimiyet tarafından yapılğan tazyiqqa qarşı oktâbrniñ 14-nde tek başına ve barışıq surette narazılıq köstergen ve şimdi eñ az 65 kişi olğan insanlarnıñ işleri boyunca mahkemelerniñ yañı qararları sebebinden raatsızlıq is eteler. Ondan ğayrı biz, Qırım aq-uquq qorçalayıcıları grubunıñ malümatına köre, Qırımnıñ eñ az 10 000 sakininiñ orduğa çağırılğanını qayd etemiz», – dep beyan etti.
O, AQŞnıñ, dünya tarafından tanılğan sıñırlar içinde Ukrainanıñ suvereniteti, mustaqilligi ve topraq bütünligine tam olaraq qol tutqanını ve Rusiye tarafından Qırımnıñ ilhaqını tanımağanını qayd etti. Kamiannıñ sözlerine köre, «Rusiye yarımada üzerindeki tam kontrolini Ukrainağa qaytarmağance» Qırımnıñ ilhaqından soñ tatbiq etilgen sanktsiyalar muafaza etilecekler. O, Ukrainanıñ şarqındaki tecavuz içün Moskvağa qarşı tatbiq etilgen sanktsiyalar da, Moskva Minsk añlaşmaları boyunca mecburiyetlerini eda etmegence quvette qalacaqlarını ilâve etti.
Yanvarniñ 23-nde Avropa Şurasınıñ Parlament assambleyası, Rusiyeni ilhaq etilgen Qırımda insan aqlarına sayğı köstermege ve sakinleriniñ havfsızlığını temin etmege, Qırımtatar Milliy Meclisiniñ yasağı ile qırımtatarlarnıñ liderlerine kirüv yasağını lâğu etmege, bütün ukrain mabüslerini azat etmege, halqara teşkilâtlarğa Qırımğa kirüvni temin etmege davet etti. Aynı zamanda AŞPA (PASE) Moskvadan ilhaq etilgen Qırımda «ealini köçürüv» siyasetini toqtatmaqnı talap etti.
Yanvarniñ 18-nde Human Rights Watch halqara aq-uquq qorçalayıcıları grubu dünyada insan aqları boyunca vaziyet aqqında esabatında, Qırımda Rusiye akimiyeti «yarımadanıñ işğaline qarşı barışıqlı narazılıq kösterüv içün Ukrainanıñ tarafını tutqan faaliyetçiler ve qırımtatar toplulığını taqip ete», dep beyan etti. Aq-uquq qorçalayıcıları Rusiyeni böyle amellerni toqtatmağa davet etti.
