Уфада 4 яшьлек кыз башы белән тәрәзәдәге рәшәткә арасына кысылып калган. Бу турыда «Башинформ» хәбәр итте.
Әлеге хәл турында коткаручыларга хәбәр иткәннәр. Сабый Менделеев урамындагы йортның 1нче катындагы тәрәзә рәшәткәсенә кысылган.
Коткаручылар килгәч ачыкланганча, 2 нәни баланы өйдә үзләрен генә калдырып чыгып киткән булганнар.
4 яшьлек кыз тәрәзәдән урамга чыкмакчы була. Башы белән кысылып калгач, ул елый, кычкыра башлый. Тавышка күршеләр килеп җитә. Алар коткаручыларны чакыра, бала туңмасын өчен, төреп куялар.
Коткаручылар махсус кораллар белән рәшәткәне кисә һәм баланы ычкындыра. Аңа медицина ярдәме кирәк булмый. Балаларны полиция хезмәткәрләренә тапшырганнар, диелә хәбәрдә.
