Җырчы Раяз Фасыйховның бик шатлыклы көннәре. Ул «Татарстанның халык артисты» исеменә лаек булды. «Халык артисты» исемен алганнан соң, җырчы беренче тапкыр зур чарада сәхнәдәш дуслары һәм коллегалары белән очрашкан.
Иң беренче итеп, остазы Салават Фәтхетдиновны «тотып алган» Раяз. «Салават Зәкиевич, ничек хәлләр? Кәефләр ничек? Якынлашып килүче Яңа еллар белән», – ди ул аңа.
«А-а-а, хорошо», – дип, шаян формада җавап бирә аңа Салават Фәтхетдинов.
«Салават Зәкиевич – «халык артисты» алуыма зур өлеш керткән шәхес, абзый. Ул «сиңа вакыт» дип әйтте», – дип дәвам итә Раяз. Салават Фәтхетдинов исә Раязны бу исемгә инде күптән лаек дип санавын белдерә. «Чак кына соңлабрак бирделәр. Бер 5 елга», – ди ул.
Раяз Фасыйховны «халык артисты» исеме алуы белән Гүзәл Уразова да тәбрикләгән. «Матур-матур җырлар көтәбез синнән. Исән-сау эшләргә язсын», – ди ул. Раяз исә: «Гүзәлне Илдар янында гына кочакларга ярый», – дип, сәхнәдәш дустын кочаклап ук ала.
