Мурманск – Санкт-Петербург пассажир поездының берничә вагоны рельслардан чыккан. Бу хакта «Интерфакс» агентлыгы хәбәр итә. Княжая станциясе янында пассажир поезды йөк составы белән бәрелешә. Тикшерү комитеты «Куркынычсызлык кагыйдәләрен бозу һәм тимер юл транспорты белән идарә итү кагыйдәләрен үтәмәү» факты буенча җинаять эше ачкан (263нче маддә).
Пассажир поезнында 326 пассажир булган. 8 кеше зыян күргән, дип хәбәр итә ТАСС, төбәкнең оператив хезмәтләренә сылтама ясап. Аларның өчесе авыр хәлдә. 3нче вагонда бикләнеп калган кешеләр бар, каза күрүчеләр күбрәк булырга мөмкин. Бәрелүдән иң зур зыян күргән вагон шушы.
Йөк поезды ватылу сәбәпле бәрелеш булган, дип фаразлыйлар. Аның ток кабул итү җиһазлары эшләми башлый, һәм ул ремонтка туктала. Ярдәм көтеп торганда, тормозларның эшләми башлавы аркасында, кузгалып китә. Һәм, алдан фаразлар буенча, пассажир поезды килә торган юлга чыга, һәм бәрелешәләр.
Видеолардан күренгәнчә, пассажир поезды 2 катлы, ә кайбер вагоннар рельслардан төшеп кенә калмаган, ауган да.
«SHOT» язуынча, каза күрүчеләр вокзалда медикларны көтә. Алар арасында пыяла ватыкларына киселгән балалы хатын-кыз да бар.
