Mash каналы Бөгелмәнең иң билгеле кешеләренең берсе – ел саен Кыш бабай булып уйнап. балалар өчен кар таулары ясап, сабыйларны велосипедта йөртеп, конфет өләшеп күңелләрен ачкан ир педофилиядә гаепләнеп, кулга алынган. Тикшерү комитеты аны 6 яшьлек кызны көчләүдә һәм балалар катнашындагы порнография әзерләүдә гаепли.
54 яшьлек ир ел саен балалар өчен кар тавы ясый иде һәм бу хакта массакүләм мәгълүмат чаралары да сөйләде. Былтыр бер бала таудан егылып төшеп, умырткасын сындыра, аннары җирле хакимият ул тауны җимереп ата.
Тикшерү комитеты фаразы буенча, 2024 елның җәендә ир бер танышының балконында ремонт ясаган һәм берара фатирда 6 яшьлек кыз белән үзе генә кала. Ир кыз белән «сексуаль характердагы гамәлләр эшли», моны телефонга төшерә һәм аннары Интернетка элеп куя.
Кыз бу хакта өлкәннәргә шунда ук түгел, вакыт узгач кына сөйли һәм ирне тоткарлыйлар. Телефонында балалар белән сөйләшүләр алып барганын һәм 6 яшьлек баланы көчләгән видеосы чыга. Фатирында тентү вакытында балаларның эчке киемнәре табыла. Ир тикшерү изоляторына ябылган, ул көчләүдә һәм балалар порнографиясе таратуда гаепләнә.
Тикшерү фаразынча, аның башка балаларны да көчләгән булуы ихтимал. Тикшерү комитеты, шул сәбәпле, бу ирнең фотосын сайтка куйган һәм аннан зыян күрүчеләрнең мөрәҗәгать итүен сорый.
Канал хәбәр итүенчә, «Иң мәшһүр Кыш бабай» моңа кадәр балалар порнографиясе таратуда хөкем ителгән кеше булып чыккан.
