Казан инструкторы Илфир гаиләсендә дә һәм эшендә дә кызыклы видеолар төшерә. Ул хатын-кызны машина йөртергә өйрәткән видео белән уртаклаша. Аның сабырлыгына сокланучылар бу видеоны карарга тәкъдим иткән.
Кара күзлек кигән яшь хатын-кыз күзен юлдан алмый да, видеога караганда, укучының беренче генә дәресе кебек, әле тормозның да ни икәнен аңлап бетерми.
– Аз гына тормоз кирәк. Алайса өлгермисез. Тормозның нәрсә икәнен беләсезме?
– Анда-монда? (укучы куллары белән ишарә ясый)
– Ничек инде анда-монда? Сулдагы педаль, аягыгыз янында. Туктарга кирәкми, аз гына басарга кирәк. Туктарга түгел, машина акрынайсын өчен генә. Хәзер борылыш ясарга кирәк. Борылышның нәрсә икәнен истә калдырдыгызмы?
– Башта монда, аннары монда? (куллары белән күрсәтә).
– Юк, борылып кире барасың. Сул «поворотник» (өч тапкыр кабатлый). Тәки кабызмады. Эх...» – дип авыр сулап куя инструктор.
