Башкортстанның Краснохолмский авылында 2 өй яна. Якынча белешмә буенча, янгын балаларның ут белән шаяруы аркасында килеп чыккан. Бу турыда Гадәттән тыш хәлләр министрлыгына сылтама белән «Башинформ» яза.
Йортлар тыгыз урнашу сәбәпле, ут каралты-курадан 2 торак йортка, 6 каралты-курага күчкән.
«Янгынны 200 квадрат метрда локальләштереп булды, ачык ут сүндерелде, утның таралуы туктатылды. Янгын сүндерү дәвам итә. Һәлак булучылар һәм имгәнүчеләр юк», – дигәннәр ведомствода.
Россия Гадәттән тыш хәлләр министрлыгы тикшерүчесе ачыклаганча, хатын-кыз 6дан 8 яшькә кадәрле 7 бала белән ата-анасы йортына килә. Бер мизгелдә балалар күз уңыннан югала. Аннары янгын чыга. Кешеләрне имин ераклыкка эвакуацияләп өлгерәләр. Бу турыда Башкортстан буенча Гадәттән тыш хәлләр министрлыгы телеграм-каналында хәбәр ителә.
