Туркия президенти маъмурияти АҚШ гўёки Президент Ражаб Тоййиб Эрдўғоннинг Швециянинг НАТОга аъзолигини тасдиқловчи фармонининг «Расмий газета»да эълон қилинишини етарли эмас деб ҳисоблагани ва имзо қўйилган ҳужжатнинг асл нусхасини сўрагани ҳақидаги даъволарни рад этди.
Туркия Буюк Миллат Мажлиси (парламенти) сешанба куни Швециянинг НАТОга аъзолиги ҳақидаги протоколни ратификация қилди. Пайшанба куни Эрдўғон Туркия парламентининг қарорини маъқуллаш тўғрисидаги фармонни имзолади, бу қарор ҳукуматнинг расмий газетаси Resmı Gazete’да чоп этилди. Шундай қилиб, Туркия ратификация жараёнини расман якунлади. Ижтимоий тармоқларда Америка Қўшма Штатлари нашрни етарли эмас деб ҳисоблаб, фармоннинг асл нусхасини ҳўл имзо билан таъминлашни сўрагани ҳақида хабарлар пайдо бўлганди.