Ўзбекистонда карантиндан қочган икки нафар шахс ушланди
Тафсилотларга кўра, жорий йилнинг 19 март куни Россия Федерациясининг Самара шаҳридан Ўзбекистон Республикасига кириб келган поезд йўловчилари қаторида 1954 йилда туғилган фуқаро Топган Э. , эпидемик вазиятдан келиб чиқиб, ўрнатилган тартибда, Самарқанд вилоятига ташкил этилган карантин марказларига жойлаштирилган.
Аммо, Паркент туманида яшовчи мазкур фуқаро белгиланган тартиб қоидаларга амал қилмай карантиндан қочган. Ҳозирда ушбу шахс Паркент туманидаги ўз уйида ушланган ва эҳтиёт чораси сифатида изоляцияга олинган.
Шунингдек, фуқаро Топган. Э.га нисбатан Ўзбекистон Республикаси Жиноят Кодексининг 257-1-моддаси (санитарияга оид қонун ҳужжатларини ёки эпидемияга қарши кураш қоидаларини бузиш) билан жиноят иши қўзғатилган ва ҳозирда тергов ҳаракатлари олиб борилмоқда.
Ҳудди шундай ҳолат бўйича Миллий гвардия матбуот хизмати ҳам маълумот берди. Хабарга кўра, 20 март куни Россия Федерациясининг Москва шаҳридан "Москва-Тошкент" поезди орқали Ўзбекистонга кириб келган Наманган вилояти (1995 йил)да туғилган фуқаро Аббосов М.Р. карантин марказидан қочмоқчи бўлган вақтда қўлга олинган.
Эпидемик вазиятга кўра, ўрнатилган тартибда Қашқадарё вилоятида ташкил этилган карантин марказига жойлаштирилган 25 ёшли фуқаро 21 март куни тахминан соат 15.30 ларда белгиланган тартиб қоидаларга амал қилмасдан карантин маркази деворидан ошиб ўтиб, қочишга ҳаракат қилган вақтда карантин ҳудуди бўйлаб хизмат олиб бораётган Миллий гвардия Қўриқлаш хизмати ходими томонидан қўлга олинган.
Ҳозирда ушбу шахсга нисбатан жиноят иши қўзғатиш чоралари кўрилмоқда.
Маълумот учун: санитарияга оид қонун ҳужжатларини ёки эпидемияга қарши кураш қоидаларини бузиш, одамларнинг оммавий касалланишига олиб келса 11 млн 150 минг сўмдан 22 млн 300 минг сўмгача миқдорда жарима солиш ёки 5 йилгача муайян ҳуқуқдан маҳрум қилиш ёки 2 йилгача ахлоқ тузатиш ишлари ёки 1 йилдан 3 йилгача озодликни чеклаш ёхуд 3 йилгача озодликдан маҳрум қилиш билан жазоланади.